Ný vika sömu áskoranir eða eitthvað á þá leðina. Áttum helgi heimavið fjölskyldan, Ástþór Örn með smá nefkvef og hósta og því ákveðið að halda honum innanhúss um helgina. Hann er búinn að vera hálfómögulegur greyið svona hálf lasinn, sofið lítið og komið okkur á lappir fyrir allar aldir. Nú er það spurning um svart karton fyrir gluggana, hægja aðeins uppferðartímann. Annars þá fór ég og keypti gítar um helgina, þenna fína Seagull gítaruppi í tónamiðstöðinni. Keypti líka harða tösku svo að Ástþór Örn muni ekki stúta honum á núll níu. Hann er mjög spenntur fyrir gítarnum og sennilega fæ ég ekki betri áheyranda kunnandi ekki meira á gítar en raun ber vitni :-)
Núna er sem sé verið að reyna að glamra aðeins til að fá smá sigg á fingurnar, strengirnir ganga full auðveldlega inn í fingurnar á mér, það er svona þegar maður beitir puttunum bara á lyklaborð þá fær maður bölvaða forhúð á fingurnar og hún er afleit til gítariðkunar. Hitt vandamálið er að ég kann um það bil núll á gítar þannig að það er langur vegur í það að ég geti farið að spila sjálfum mér til ánægju og enn lengra þar til ég get spilað öðrum til ánægju.
Að öðru, Arsenal er orðin enskur meistari og enn mánuður eftir af tímabilinu, hvað segir það mönnum :-)

Jæja þá er síðasti virki dagur vikunnar runninn upp. Þessi vika hefur vinnulega séð verið alveg mögnuð, ekki nema þriðji dagurinn sem ég er í vinnu, þetta er náttúrulega almagnað, frábært ætti alltaf að vera svona. Magnað að fá frí á svona góðviðrisdegi eins og og var hérna í gær, 16°C og sól hvað vill maður hafa það betra í Apríl??? Áttum fínan dag í gær fjölskildan fórum með Ástþór Örn í gönguferð í gær, aðeins að reyna að tappa smá orku af drengum, en það er af nógu að taka á þeim bænum :-) Fengum okkur svo take out hjá Vegamótum í boði Kötu þeir klikka ekki strákarnir þar frekar en fyrri daginn. Mér finnst fínn matur hjá þeim, reyndar ómögulegt að sitja inni sökum reiks, en á svona dögum eru borð í portinu og svo alltaf takeaway á 10% afslætti! Svo er það bara að slappa af um helgina og hafa það gott, spurning um að fara og velja sér gítar í dag, taka helgina í glamur af verstu gerð, spurning um að leggja það á Svanhildi!!!!

Jæja þá er vikan að verða hálfnuð. Ótrúlegt hvað það munar miklu að vera bara að vinna 4 daga í viku, þetta verður einhvernvegin bara hálfgert grín þannig. Ætti að setja í reglur að maður megi ekki vinna meira en fjóra daga í beit, það væri það. Annars er ég að drukkna í vinnunni, búin að vera æði löng törn á mér núna og ég sé ekki fram á að henni ljúki neitt næstu mánuðina. Ekki það að maður er þá ekki að láta sér leiðast í vinnunni á meðan það er jú alltaf plús. Annars þá er ég að testdræva póstþjónustu hjá google (ásamt fullt af öðrum obviously) gmail, frekar magnað í raun, þeir bjóða manni upp á 1000MB geymslupláss, það verur að teljast frekar rausnarlegt. Ef að þetta er að virka vel mun maður segja hitapóstinn sinn í salt (Hotmail fyrir fattlausa). Þannig er þetta nú allt saman!

Þá er maður kominn heim aftur frá útlöndum. Viða áttum alveg frábæra helgi saman hjónin í Kaupmannahöfn og það má lesa nánar um það á "Helgarferð til Köben". Höfðum það í raun alveg skuggalega gott, ferðin hefði bara þurft að vera aðeins lengri. Ástþór Örn var með afa sínum og Ömmu í sveitinni fyrir vestan og það væsti ekki um hann þar, hann var samt svoltið að vakna í gærkvöldi að athuga hvort allir væru ekki á sínum stað, hvort menn væru nokkuð stungnir af aftur!!! Annars þá eru þau atriði sem koma til með að standa uppúr í minningunni eftir þessa ferð, var gönguferðin í Lyngby, hún var mjög skemmtileg, gaman líka að hitta Hans Ole aftur, svo var það ferðin á Era Ora, ítalska veitingastaðinn. Þessi staður er hreint ótrúlegur, eins og Svanka segir á síðunnir "Helgarferð til Köben" þá er engin matseðill í gangi, það er menn geta ekki valið um neitt, bara einn matseðill og sá ekki slæmur. Hef bara aldrei held ég borðað eins góðan mat og þarna, þetta var alveg himneskt. Maður fékk ekki brauðkörfu þarna, neib þarna var ungur drengur sem hafi þann starfa að fylla á sódavatnsglös og færa manni brauð þegar maður var búinn með það sem var á diskinum manns, sem sagt brauðdrengur! En það var samt voða gaman að koma aftur heim og hitta Ástþór aftur, næst þá tekur maður hann bara með sér og verður lengur!!!!

Jæja þá er það föstudagur. Mættur frekar snemma (6:30) í vinnuna þar sem ég þarf að fara upp úr hádegi út á flugvöll og til Danmerkur. Verð nú að segja að ég er farinn að hlakka frekar mikið til að koma þangað aftur, það er það langt um liðið síðan ég var þar síðast að maður er búinn að gleyma hvað Danir eru óendanlega miklir nöldrarar. Ekki það að það er svo sem allt annar pakki að koma þangað sem ferðamaður en sem heimamaður, maður ætti nú að sleppa við nöldurpakkann niður í miðbæ, þó veit maður aldrei með Danina. Ég er að berjast í útboði sem að ætti að fara í yfirlestur í dag, bind nú vonir um að það takist, í það minnsta ætla ég að reyna að ná því fyrir hádegið. Enginn Ástþór Örn heima í gær, hann farinn vestur með afa sínum og ömmu þannig að við hjónin vorum bara ein í kotinu, alltaf skrítið að vakna ekki með hann í herberginu!!! Verður mjög gaman að hitta hann aftur eftir helgi. Megið þið eiga góða helgi gott fólk!

Fékk þennan link sendan í pósti um daginn og verð að segja að þetta er alveg mögnuð lesning. Mæli með að fólk kíkji á þetta er löng lesning allt í allt en þetta er bara alveg þrælmagnað. Er sem sé um móoturhjálatúr í gegnum Gosthtown í Chernobyl.

http://www.angelfire.com/extreme4/kiddofspeed/chapter1.html

Jæaja þá er afmælisdeginum lokið. 30 ára plús einn dagur and counting!!!! Var frekar findinn afmælisdaguri í gær, var mættur í vinnuna klukkan 7 og fór héðan eftir 18 í gær, ekki mikil tilbreyting í því :-) Svanhildur pikkaði mig svo upp og við rúlluðum niður á Austurlanda hraðlestina (takeaway frá Austur India fjelaginu) og kipptum um réttum fyrir heimilisfólkið sem svo var svolgrað niður með einni rauðri. Þetta er alveg magnaður matur hjá þeim verð ég að segja, svo sem dýrt takeaway 1500 kr á mann, en samanborðið við ómerkilega pizzu er þetta ekki svo dýrt svona til hátíðarbrigða og margfallt er þetta jú betra. Svo fór Svanhildur aftur upp í tölvu en hún er í heimaprófi núna sem hún þarf að skila fyrir klukkan 4 í dag og sat hún fram undir klukkan 12 og þá var ég náttúrulega löngu sofnaður. Diddi kíkti svo aðeins inn í gær, hann er á leiðinni til Prag með Sigyn og eru þau sennilega á vellinum núna eða vélinni þannig að þetta verður fín ferða helgi hjá okkur bræðrunum. Fékk svo nokkrar hringingar eins og lög gera ráð fyrir. Svo er það náttúrulega gítarinn sem Svanka og Ástþór Örn ætla að gefa mér, ætla að fara með þeim og velja einn grip. Svo er það bara að fara og læra að glamra, stefnan er að eftir svona tvö ár verði maður orðin slarkfær glamrari!!!!

Þá er stundin runnin upp, Ziggy er formlega orðinn gamalmenni. Árin orðin að þremur tugum en skemmtilegra mun það þó verið hafa er þau fylltu tugi tvo. Meira að hlakka til þá en núna. Núna setur samfélagið mér þær skorður að ég eigi að fara að hegða mér eins og fullorðinn maður, hlusta á RUV og hafa hegðun almennt til fyrirmyndar öðrum til eftirbreitni og er þar skýrskotað til ungdóms lands vors. Við þrítugt breitist maður sem sé í Elías fyrirmynd barna í góðum siðum. Málið er hinsvega það að ég mun fresta því um einn tug að stilla á RUV klukkan 7 á morgnanna, en frekar mun ég horfa á það að hafa aðgát í nærveru sálar sem ung er að árum en þó ekki alltaf, nei alls ekki alltaf einhver þarf að kenna þessum krökkum á hið raunverulega líf, nokkur góð blótsyrði og einstaka klámvísur hafa fáa sakað. Því neita ég að láta samfélagið setja mér skorður og randskylirði og festa mig í einhverju fyrirfram ákveðnu hegðunarmynstri, ég mun halda áfram að láta eins og fífl finnist mér það viðeigandi en sína hátterni sæmandi aðalsmanni beri svo undir. Mýmörg dæmi má finna um fólk sem hefur hafnað þessum siðferðisskyldum sínum og er það nærtækasta kanski Björn Óðalsbóndasonur, hann er enn engu nær að verða fullorðinn, og þó svo að hvítu buxurnar séu sennilega ekki lengur til að tala um hefur hann sýnt lítil merki þess að samfélagið hafi bugað hann!!! Sitt sýnist hverjum um þessi efni en staðreindin er eftir sem áður sú að maður hefur náð að "cash inn" einu ári enn og er það vel stefnan er svo að halda því áfram um sinn. Old man Ziggy signing out!!!!!!!!!!

Hvað hefur gerst á þessum degi og hverjir hafa fæðst????
http://www.olywa.net/blame/cal/0414.htm
http://www.electricscotland.com/history/today/0414.htm
http://www.todayinhistory.com/

Jæja þá eru frábærir páskar búnir. Vorum í góðu yfirlæti á Snæfellsnesinu, söguðum þar göt í steypuveggi í gríð og erg og átum páskaegg og drukkum öl þess á milli. Maturinn hátt yfir meðallagi og maður enn hálf eftir sig af ofáti. Svo er stefnan sett á Köben um helgina þar sem tengdaforeldrar mínir splæstu á okkur ferð þangað í tilefni þrítugsafmælis míns. Það verður mjög gaman að koma þangað aftur og núna sem túristi en ekki sem heimamaður. Annars þá er allt brjálað að gera í vinnunni hjá mér núna, deadline að bresta á og allt á fullu, maður þarf að vinna hratt til að ná þessu áður en út er haldið, fínt að vera eitthvað fram á kvöld á fimmtudag!!!!!

Þá er maður orðin endanlega geðveikur, mættur í vinnu klukkan 7:30 á frídegi, þetta er náttúrulega mun meira en nett veila!!! Plús: jú maður fær daginn á yfirvinnu og mér veitir ekki af því að reyna að grynnka á vinnustaflanum. Mínus: Það er sjúkt að vera að vinna á frídögum nema einstaka helgar. Þannig er það bara ég sem ekki reglurnar. Annars þá skreppum við hjónin vestur á eftir svona um 3-4 leitið, skrítið að hafa ekki Ástþór Örn hjá okkur í gær, mann er farið að hlakka mjög til að hitta kappann á eftir. Svo var smá happadrætti í vinnunni í gær, allir diskarnir í mötuneytinu voru með númer á botninum og maður skilaði þeim svo inn að máltíð lokinni og gat unnið páskaegg. Ég náttúrulega vann ekki í fyrstu atrennu en þar sem ekki gengu öll eggin út var dregið úr "óseldum miðum" og þar kom mitt númer upp og ég fékk þetta fína páskaegg númer 4. Mikil lukka með það. En framundan vonandi hinir albestu pákar. Megið þið eiga gott páskafrí gott fólk!

Góðan daginn gott fólk. Verð að viðurkenna að ég er frekar fúll eftir leiki gærdagsins, tapa fyrir Chelsea í meistaradeildinni, þetta er ljóta skömmin, Chelsea er með skíta lið og eru komnir mun lengra í þessari keppni en geta þeirra segir til um, en svona er fótboltinn. Mínir menn áttu líkt og í bikarnum um daginn fínan fyrrihálfleik en voru svo á afturfótunum í þeim seinni, virka þreyttir verður að segjast. En nóg um það, við vinnum bara næst! Ástþór Örn fer svo með afa sínum og ömmu á Snæfellsnesið á eftir en við Svanhildur förum svo seinnipartinn á morgun, ég ætla að ná einum degi í vinnu á morgun, veitir ekki af því verður að segjast. Það verður kærkomið að komast í smá frí út á land, ekkert að því að slappa af í sveita sælunni með bók í hönd og jafnvel einn öl, hver veit!!!

Næst síðasti vinnudagurinn í þessari viku, kæmi mér reyndar ekki á óvart ef að ég þyrfti að vinna eitthvað meira en það!!! Þvílíka sólin og blíðan úti, er reyndar ekki nema -2°C en hið besta gluggaveður. Er ekki búin að fá mér páska egg en það stendur til bóta, sá líka að það er 30% afsláttur í Nóatúni núna, spurning um að bíða aðeins lengur!!!! Svanhildur þurfti upp í skóla núna í morgunn þannig að þetta var í fyrsta sinn í mjög langan tíma sem ég var ekki einn í bílnum á leiðinni í vinnuna, skemmtileg tilbreiting það!! Venjulega er ég einn á ferð en þau mæðginin heima að kúra. Svo þarf maður að fara að skipuleggja sumarfríið sitt, ætti að eiga einhverja daga í því!! Findið að vera að fara að fá sumarfrí í fyrsta sinn á ævinni, átti reyndar part úr ágúst í fyrra úti í Danmörku þegar ég var búinn með verkefnið mitt, en það fór mikið í að pakka og ganga frá íbúðinni og koma sér út úr kerfinu í Danmörku þannig að um hreina frídaga var víst eitthvað minna. Verður gaman að sjá hvernig þetta kemur út núna í sumar. Áfram sumarfrí!!!!

Þá er byruð ný vinnuvika og verður hún í styttra lagi að mér skilst. Unnið til og með miðvikudags og svo ekki aftur fyrr en þann 13 Apríl sem er þriðjudagur. Þetta væri að jafnaði mjög gott en þar sem útboðsdeadline er hjá mér þann 17apríl og ég á enn eftir að skilgreina álög og krafa út frá jarðskjálftaálögum og kraftreikna allt batteríð þá er tölvert eftir enn þá. Þetta gamla hefðbundna útboð er svo sem klárt en allt of mikir reikningar eftir!!! En nóg um vinnu nörda fræði, átti alveg ljómandi helgi með fjölskyldunni, fórum niður á tjörn með Ástþór Örn á sunnudaginn að gefa öndunum, það var voða gaman, röltum svo smá á laugarveginum áður en við fórum heim með hann að leggja sig. Hann var svo ekkert á því að sofna þannig að mamma hans rölti með hann niður í Hagkaup. Ég var að setja í vél og ákvað svo að rölta bara emð þeim, þannig að ég hljóp á eftir þeim en þar sem mín er snör í snúningum náði ég þeim rétt áður en þau vorum kominn alla leið þannig að þett var sprettur að heiman og niður í skeifu. Djöfull er ég kominn í lélegt form það er ekkert findið við það ég var gersamlega að tapa lífinu eftir þennan sprett, hjartað við brotmörk og lungun nánast farinn. Held að það sé að komast tími á það að fara að hreyfa sig meira, annað en putta á lyklaborð og þesslags hreyfingu!!!

Föstudagur til fjár, gæti verið nokkuð til í því núna þar sem launin ættu að detta inn í dag. Það væri í raun miklu sniðugra kerfi ef að maður fengi full mánaðarlaun alltaf á hálfsmánaðar fresti!!!
Þar sem ég er alveg að sofna en samt í föstudagsskapi ætla ég að byrta eftirfarandi spaug!
Til að lífga uppá gráan hversdagsleikann og gera dagana meira spennandi og innihaldsríkari, er mælst til að þú gerir eitt/fleiri/öll eftirtalin atriði reglulega...

1. Í hádeginu: leggðu bílnum og sittu í honum með sólgleraugu. Miðaðu með hárþurrku á bílana sem keyra framhjá. Athugaðu hvort þeir hægi á sér.
2. Kallaðu sjálfa þig upp í innanhúss kallkerfinu. EKKI reyna að breyta rödd þinni.
3. Stattu föst á því að netfangið þitt sé: Xena-Warrior-Princess@OCDSB.edu.on.ca eða Elvis-the-King@OCDSB.edu.on.ca
4. Hvert skipti sem einhver biður þig að gera eitthvað fyrir sig, spyrðu, má bjóða þér franskar með þessu?"
5. Stilltu ruslafötunni upp á skrifborðið með miða á sem segir,,Innbox"
6. Þróaðu með þér óeðlilega hræðslu við prjónadót
7. Fylltu kaffivélina með koffínfríu kaffi í þrjár vikur. Þegar allir eru búnir að losna við koffínfíknina, fyllirðu á með espresso.
8. Á allar kvittanir skrifar þú; Fyrir kynlífsþjónustu.
9. Ljúktu öllum setningum þínum með; Samkvæmt spádómum.
10. Ekki nota punkta.
11. Hoppaðu í stað þess að ganga.
12. Spurðu fólk hvers kyns það sé. Hlæðu brjálæðislega þegar það hefursvarað.
13. Taktu sérstaklega fram í bílalúgusjoppunni að pöntun þín sé,,taka með".
14. Syngdu með í óperunni.
15. Farðu á ljóðakvöld og spurðu afhverju ljóðin vanti allan ryþma.
16. Hengdu flugnanet í kringum skrifborð þitt. Spilaðu frumskógarhljóð af diski alla daga.
17. Tilkynntu vinum þínum, fimm dögum fyrir partýið að þú komir ekki því þú sért ekki alveg upplagður.
18. Biddu vinnufélaga þína að ávarpa þig með Gladiator-nafni þínu,Rock Hard.
19. Þegar peningarnir koma út úr hraðbankanum hrópar þú ,,Ég vann! Ég vann!!! Þriðja skiptið í þessari viku!!!!"
Og að lokum, síðasta ráðið til að halda uppi mátulegri geðveiki í hversdagsleikanum:
20. Sendu þetta bréf til allra í netfangaskrá þinni, líka þeim sem hafa sent þér þetta og einkum þó þeim sem hafa sérstaklega frábeðið sér ÖLL svona bréf!!
Þannig er það góða helgi gott fólk!

Voða lítið að frétta af mér í dag, er bara frekar þreyttur svona í morgunsárið. Ástþór Örn að vakna smá í nótt, ekkert alvarlega samt en ég var nú frekar syfjaður þegar klukkan hringdi í morgun. Var reyndar mikill göngudagur hjá mér í gær, fór með bílinn niður í síðumúla að láta setja í hann handfrjálsa bílaeiningu sem að fylgdi með bílnum þegar hann var keyptur en ég átti þá ekki síma sem ég gat notað þetta í. Labbaði svo til baka í vinnuna og seinna um daginn labbaði ég svo og náði í bílinn. Þetta var mjög hressandi heilsubótaganga verður að segjast, eini gallinn var þetta bölvaða slabb sem er út um allt núna maður þarf að passa sig á að láta ekki gusa á sig þegar maður gengur um gangstéttir bæjarins!! Svo höfðu þeir sem settu bílaeininguna í fært barnastólinn og ég var að reyna að festa hann í morgunn, tókst ekki betur til en svo að ég braut eina festingu!!!! Meira djöfulssins draslið verð ég að segja, var ekki að taka almennilega á því einusinni, en þetta er klemma sem klemmir öryggisbeltiðog þarf að taka á en þessir blessuðu VÍS stólar er greinilega svona ógeðslega öruggir því að þetta brotnaði við lítið átak!!! Spruning um að fara í Babysam og kaupa sér stól sem að endist fram að 12 ára aldri!!!!

Þá er veturinn komin aftur með stæl. Sennilega um 10-15cm af snjó úti eftir nóttina og öll blóm komin á kaf. Þetta er reyndar mjög blautur snjór og er á fullu við að bráðna í frostleysinu þannig að væta verður sennilega mjög seinni partinn í dag. Þetta er í raun leiðinlegasta gerð veðurs þessir helv. bleytu umhleypingar, sérstaklega þar sem ég er ný búinn að fá bílinn úr þryfi og bónun þá er þetta ekki skemmtileg tímasetning. Annars þá kíktum við hjónin og Ástþór Örn ásamt Kötu í afmælismat í gærkvöldi, frænka Svanhildar 11 ára. Það var mjög fínt, svaka góð sjávarréttasúpa en góðar sjávarrétta súpur eru allger snilld, sérstaklega ef þær eru fullar af humri. Það mun víst vera að við förum í hólminn (Stykkishólm) í sumar og fáum okkur sjávarréttar súpu niður við höfnina á veitingastað sem þar er starfræktur á sumrin og bíður upp á sjávarrétta súpu með öllu því sem er ætilegt og kemur úr firðinum. Skemmst frá því að segja að súpa sú er snilld og hlakka ég mjög til að renna slíkri niður með kaldri öl krús. Annars er þetta með ölið alveg magnað, ég er búinn að kaupa sem samsvarar 1 kassa af öli síðan ég flutti heim eða fyrir sjö mánuðum en slíkt magna fór á tæpum mánuði í danaveldi. Þetta er nú meira helv...! fasistaveldið sem við búum í hérna. Og mér þykir leiðinlegt að segja það en það eru alltaf einhverjar kerlingar sem eru harðastar í því að halda upp þessum fasista boðum og bönnum sem að stjórnin framfylgir. Ef að það kemur umræða um að stórmarkaðirnir megi selja áfengi þá er það alltaf kona sem talar á móti slíku í öllum umræðuþáttum! Af hverju er það, ég varpa þessari mannfræðilegu spurningu fram? Eru þær að reyna að hafa vit fyrir þjóðinni á sama hátt og þær halda körlunum við raunveruleikann heimavið??? Afhverju er almennt verið að hafa vit fyrir fólki, það er jú í eðli fólks að fá að reka sig sjálft á og læra af reynslunni! Ég segi lækka áfengisgjöld á léttum vínum og öli, leyfa þjóðinni að vera mollí í nokkra mánuði en eftir það fer þetta að verða hversdagslegt og fólk hættir þessu sulli og fer að umgangast þessa hluti af meiri skynsemi en hún gerir í dag. Þannig er það bara nú!

Þá er vikan komin á fulle sving og það í góðu lagi. Var sofnaður um elleftu í gær og vaknaði því á undan klukkunni í morgun, það er ágætt þar sem Ástþór Örn er farinn að vakna frekar snemma svona eftir að það fór að birta og ágætt að vera ekkert að láta hann rumska við klukkuna. Svo er Svanhildur að fara í próf í dag, búin að vera voða dugleg að lesa. Ég gat ekki annað en vorkennt henni þegar hún var að lesa í gær og hugsað hvað ég er ótrúlega feginn því að vera búinn í þessu skóla prógrammi. Mig langar akkúrat núll til þess að fara aftur í skóla og einungis stuttnámskeið í nánustu framtíð myndu koma til greina hjá mér. Enda held ég líka að ég sé alveg búinn að skila mínum tímum í setu á skólabekk og gott betur, stefnan var jú alltaf hjá mér að fara ekki í háskóla og helst ekki í menntaskóla en svona geta hlutirnir breist! Annars þá er Las Ketchup með Asereje í útvarpinu núna, eru engin lög varðandi það að spila svona lélaga múskík svona snemma morguns, þetta er mannskemmandi fjári en ég svo sem hvarta ekki meðan að þeir spila ekki Mambó nr.5 eða Hanson systur, það yrði of mikið að taka inn svona nývaknaður!!!!

Já þá er þessari aldeilis fínu helgi lokið. Vorum ein í kotinu hjónin og Ástþór og höfðum það alveg ljómandi fínt. Elduðum nýjan kjúklingarétt á laugardagskvöld, svona "Miðjarðarhafsrétt" og hann var alveg snilld, ekkert meira um það að segja, sá réttur verður gerður aftur liggur það víst á ljósu. Svanhildur er svo búin að vera að læra um hlegina fyrir próf á þriðjudag þannig að við Ástþór erum búnir að vera að spauga svoltið. Svanhildur samt alveg náð að gefa sér tíma öðru hvortu til að taka þátt í spauginu. Mamma og pabbi kíktu við í gær á leiðinni heim úr fermingu. Maður nennti nú ekki út með Ástþór í gær þar sem skiptust á snjúhríðar og sterkt sólskin í allan gærdag, frekar geðklofið veður verður að segjast. Annars hin ljúfasta og besta helgi hjá okkur sem er mjög vel, varla að maður nenni að byrja aftur að vinna!!!!!

Jæja núna er maður alveg að tapa sér, vinna á laugardegi!!! Ástþór Örn vakti okkur klukkan hálf átta í morgun og síðan erum við fjölskildan búin að rölta okkur niður í hagkaup og kaupa í matinn og taka okkur göngutúr í leiðinni. Búið að koma mikilu í verk í dag og klukkan ekki orðin eitt!!!! Svanhildur er svo að fara að læra og Ástþór Örn út í vagn þannig að það var tilvalið fyrir mig að ná mér í nokkra yfirvinnu tíma, ekki veitir af heldur að reyna að grynnka á vinnu staflanum hjá mér!!!! Megið þið eiga góða helgi!!!

Jæja maður er enn að hræra í nýja templatinu, komst að því þegar ég kom heim og sá þetta í explorer (ég nota Operu, mun betri vafari) þá voru linkar og archives neðst á síðunni en ekki til hægri eins og ég hafði styllt því upp í Operuni. Prófaði þetta í vinnuni áðan og fékk þetta neðst þar til að ég stækkaði gluggan með takkanum í horninu uppi hægramegin en þá fluttust linkarnir hægramegin á skjáinn. En Microsoft er eins og allir vita homma hugbúnaður (i.e. öfugsnúinn) sem ætti að reyna að varast í lengstu lög. Því mæli ég með því að allir kíki á Operuna (opera.com) (má líka nálgast á www.download.com) en þetta er mun skemmtilegri browser og það besta er að hann er ekki frá Microsoft og það er Íslendingur sem á þetta norska fyrirtæki sem gerir operuna. Mér finnst perónulega að ég ætti að fá sölulaun frá þeim fyrir þennan pistil. Annars þá var að opna ný Elko búð og þeir eru með á opnunartilboði DVD brennara í tölvur (Aopen) á 7800 kr sem er ekki mikið fyrir slíka græju. Spurning um að fara að fá sér svoleiðis búnað!!! En samt best að velta því smá fyrir sér þannig að þeir nái að selja þá alla upp og ég þurfi ekki að taka ákvörðun um að kaupa slíkt, geti bara orðið fúll yfir því að hafa misst af þessu :-)

Þá er fyrri leikurinn í meistaradeildinni búinn og hann fór ekki svo illa, við skoruðum mark á útivelli þannig að Arsenal er með smá forskot fyrir seinni leikinn. Ég kíkti í afmæli til föðursystur minnar í gær, voru nokkrir ættingjar í suprice partýi, það var mjög gaman að því. Svo kíkti pabbi í heimsókn í gær og færði mér bók sem ég var að leyta að í Kolaportinu um daginn, hann hafði þá farið aftur í Kolaportið og fundið hana. Las þessa bók þegar ég var svona 14 ára og hafði mjög gaman að svo núna er að sjá hvort smekkur minn hafi breyst mikið eða hvort bókin standi enn fyrir sínu. Svo er líka orðið styttra en ekki í næsta helgarfrí og er það vel!

Heyriði ég var að skoða ný template í þessu blessaða bloggi og ætlaði að velja preview en valdi að einhverju óskiljanlegur orsökum use. Gamla templateið er ekki lengur í boðið og því þarf að notast við þetta í staðinn. Það þarf svo sem ekki að vera svo slæmt þetta gamla var mokljótt hvort sem er!!!

Þá er vikan að komast á þann punkt að hún er að styttast í annan endann. Það er í rauninni hið besta mál verður að segjast, þyrfti reyndar að vinna um helgina ef að vel ætti að vera en sé nú bara til hvort ég nenni því. Skruppum til Þórdísar systur í smá kaffi í gær, Ásta átti afmæli um daginn og það var haldið upp á það á sunnudaginn, við mættum ekki á sunnudag þar sem við vorum ný komin að vestann og þreytt eftir helgina, búið að hnýta tölvert í okkur fyrir að hafa ekki mætt þar. Finndið fyrirbæri fjölskyldan, þegar það verður issue að maður mætir ekki barnaafmæli þá er ekki von á góðu :-) En nóg um það, við sem sé mættum í gær og það var mjög fínt, Ástþór Örn hefur alltaf gaman að því að komast í nýjan dótastafla og skemmti sér því konunglega. Svo var það nú bara róleg stund fyrir framan sjónvarpið í gærkvöldi með poppkorn og alles, hvað vill maður hafa það betra???

Jamm Svanhildur gekk á kaupum á Pixis miðum í gær og það verður ekkert smá gamann að fara og sjá þá læf. Svo er það bara spurninginn um að ná að sitja fyrir miðum má Placebo ég ætla ekki að missa af þeim það má ljóst vera. Annars þá mallar lífið sinn vanagang, það er vinna fyrripart og heima seinnipart og er það alveg ágætt. Ástþór Örn fór í vigtun og mælingu í gær er orðin 81cm og 10,6kg, ágætt að hann er enn að þyngjast svona í ljósi þess að hann stoppar ekki allan daginn, er gersamlega á útopnu frá því að hann vaknar og þangað til hann sofnar aftur. Alveg magnað hvað svo guttar eru með hátt orkulevel, maður yrði illa þreyttur ef maður fremdi einungis brot af þessum hamagangi sem að hann er að fremja!! Annars finnst mér alveg magnað hvað veðrið er orðið styllt þessa dagana eftir rok helgarinnar, núnar er bara sól og blíða þegar maður keyrir í vinnuna á morgnana, fer svona um það bil að komast vorfílingur í mann!!!

Þá er helgin liðin en þessi fór fram í góðu yfirlæti á Snæfellsnesinu. Búið að snæða dýrindis lambakjöt og danska lifrarkæfum með tilbehør og alles. Ástþór Örn skrapp í fjárhúsin og leist ljómandi vel á þetta allt saman, hann er svo mikklu kátari með lífið í sveitinni en í borginni að það er nánast finndið að sjá muninn á barninu, það er hlegið nánast allan tímann í sveitinni. Bragð er að þá barnið finnur segir máltækið!!!!! Var reyndar alveg hífandi rok mestan part helgarinnar, það hefði nú alveg mátt sleppa því mín vegna. Svo er það bara ný vinnuvika áður en næsta helgarfrí lætur sjá sig. Er núna að hlusta á Machina II með Smashing Pumpkins, en það er plata sem var tekinn upp samhliða Machina I / The machin of god en aldrei gefinn út, aðeins 25 stykki af vínil pressuð, Billy Corgan setti svo löginn af þessari plötu inn á heimasíðuna sína til að fólk gæti downloada frítt!!!! Svona á að gera það, "Go Billy".

Bara fyrir þá sem ekki eiga slíkt þá er mér ljúft að tilkynna að við hjónin eigum miða á Pixies!!!!!!!!!

Þá er hann runninn upp föstudagurinn. Stefnan er að skella sér í sveitasæluna í dag, það er keira út á Snæfellsnes og verja helginni þar. Það þykir mér verða hið albesta mál verð ég að segja, albesta. Hefði svo sem ekkert veitt af því að vinna smá um helgina þannig að það er fínt að fara út á land þannig að það sé ekki valkostur! Veitir heldur ekkert af því að taka mér hlegarfrí. Það er stórlega vanmetið að eiga frí, undir staða allrar vinnu eru góð frí það er bara þannig. Óþreyttur starfsmaður er mun betri en þreyttur sérstaklega ef hann er andlega þreyttur, og þar koma helgarnar sterkar inn. Því skal varast helgarvinnu og annað bull eins og heitan eldinn. Því mætti bæta við ellefta boðorðinu: Þér skuluð eygi um helgi vinna! Líst vel á það!

Vaknaði í morgunn og það var skít kalt í herberginu okkar, veit ekki hvað það er með kulda í svefnherbergjum en það er nánast vonlaust að fara undan sæng í svoleiðis herbergjum. Þurfti að beita mikklu meiri viljastyrk en ég hef yfir að ráða til að komast fram úr rúminu!!! Tókst samt. Skrapp í gönguferð með fjölskyldunni niður laugarveginn í gær eftir vinnu, fínt að nýta aðeins góða veðrið í smá hreyfingu, ekki eins og að maður fái neitt af slíku í vinnunni. Ljóta bullið að vera að velja sér vinnu sem fer fram fyrir framan tölvu, það kann ekki góðri lukku að stýra. En er það einhver þarna úti sem kann lukku að stýra, góðri eða slæmri?? Ef svo er endilega takið mig í ökutíma :-)

Dagur miðara viku og enn sól og sumarm hvað vill maður hafa það betra (nema helgi og sól og sumar). Fékk nýtt skrifborð í vinnunni í gær, voða fína vinnustöð, orðið allt annað vinnuumhverfi. Eini gallinn er sá að gamla skrifborðið var úr massívu tré með áföstum skúffum og þurfi það að fara upp á fjórðu hæð. Gabbaði vinnufélagana til að koma og hjálpa mér að bera það upp, það tókst þó að maður væri gersamlega með kúkinn í gatinu við það. En svo þurfi að sækja nýja borðið niður á aðra hæð (ég er á þeirri þriðju) og var það þræl þungt líka. Því verður að segjast að skrifstofu þrællinn sem ekki hreifir sig mikið er bara með strengi í dag og ekki lítið af þeim. En það er ágætt tilbreiting frá þessu fjárans hreifingarleysi. Skrapp svo í hádeginu í gær með Vidda og Torfa á Trocadero í hádegishlaðborð, það var bara alveg ágætt hjá þeim strákunum hlaðborðið, gaman að hitta Vidda og Torfa líka í góðu tómi.

Jæja vikan byrjuð að malla og styttist þar af leiðandi óðfluga í helgina. Flugurnar eru reyndar að byrja að kvikna þannig að sennilega er einhver óð fluga þarna úti sem að styttist í helgina hver veit ekki ég. Var að fá svona yfirlist lista yfir verkefni tengd Hellisheiðar virkju og mér sýnist nú í fljótu bragði að það verði nóg að gera næsta árið og gott betur en það og upp úr apríl fer allt á fullt. Annars þá gerði ég góðverkið mitt á sunnudaginn. Fann GSM síma fyrir utan Kolaportið (á planinu við Bæjarins bestu) en þar lá síminn í gangi og alles og bakið var dottið af honum þannig að miði með pin númerinu var dottinn út (ekki mjög gáfulegt að geyma pin númer á símanum!!). Ég náttúrulega tékkaði hvert viðkomandi væri að hringja og eina númerið sem hringt hafði verið í var til Dau. Ákvað ég því að fara bara með síman á löggustöðina þar sem ekki væri víst að Dau talaði íslensku! Þegar ég var svo að keira upp Hverfisgötuna hringi Dau og talaði íslensku og alles. Þetta voru sem sé tvær ungar stúlkur um 16 ára eða svo með móður annarrar eða beggja í símaleit. Mikil gleði greyp um sig hjá stúlkukindinni þegar hún fékk aftur síman í hendurnar fyrir utan löggustöðina við Hlemm. Góðverk vikunnar sem sé afgreitt!

Þá er enn einni helginni lokið og eins og venjulega mætti hún vera fimm dögum lengri. Var hin fínasta helgi hjá okkur, farið út á róló með Ástþór og mamma og pabbi litu inn, svo og Þórdís systir. Skrapp með pabba í Kolaprotið á sunnudag, þangað hef ég ekki komið í mörg ár
gaman að kíkja á íslenska markaðsstemmingu maður kynntist þessu vel í Danmörku, alltaf einhverjir antik markaðir þar í gangi. Verður nú að játast þó að þeir eru mun flottari en þessir markaðir hérna heima!!!! Svo fór boltin mjög vel um helgina, öll vondu liðinn töpuðu. Annars þá keypti ég mér nýjan GSM síma á föstudaginn og er búinn að vera að leika mér með hann um helgina, voða fínn minigolf leikur í honum :-) Annars er þetta hið besta tól (má líka vera það fyrir þann pening sem hann kostaði) af Sony Ericsson gerð Z600 svo kallaður skeljasími(opnast í miðju). Myndavél og allur pakkinn fylgir þannig er það alltaf gaman að fá ný tæki!!! Svo elduðum við okkur hreindýra steik í gær, ég er enn brosandi eftir að hafa snætt þann dýrindismat.

Síðasti dagur vikunnar (það er vinnuvikunnar) er runnin upp og er það alveg ótrúlega vel. Svona almennt er ég ekki að nenna að vera í vinnunni þessa dag, eftir svona törn eins og ég var búinn að vera í þá nennir maður ekki alveg að halda áfram á fullum afköstum. En svona er lífið og ekki þíðir að gráta Björn bóna (og enn síður Björn Böðvars!!). Maður heldur enn í vonina að veðrið fari nú aðeins að lægja svo að maður geti skroppið með guttann út á róló um helgina, það er bara ekki alveg að gera sig þetta rignin/rok veður þessa dagana það verður að segjast. En sannast sagna þá er mikil tilhlökkun fyrir helgarfríið, er búinn að vera að vinna og vera með vinnuna á bakinu undanfarnar helgar en þessa helgi verður vinnan skilin eftir á Laugarvegi 178 það er bara þannig og enganvegin öðruvísi!!!

Þá er ekki nema þessi dagur + 1 í helgina. Mínir menn komust í 8 liða úrslit í meistaradeildinni í gær og var það vel. Tinna systir hennar Kötu kom í mat í gær, stúlkan varð 25 fyrri fáum dögum og kom í tilefni þess í smá mat í gær. Þegar ég mætti svo í vinnuna í morgun klukkan átta að þessu sinni óskaði Einar mér til hamingju þar sem ég hafði unnið rauðvínshappdrættið í vinnunni!!! Vinningurinn er fimm flöskur af rauðvíni sem er mjög vel! Í ljósi þeirrar staðreyndar að minn hæðsti vinningur í happdrætti til þessa voru tveir lítrar af mjólk í Fjarkanum heitnum (skafmiðaleikur á síðustu öld) verður þetta að teljast vinningaviðbót sem um munar. Ég hef sem dæmi aldrei fengið 3 rétta í lotto, mér er bara ætlað að vinna fyrir minum aurum það er bara þannig. Þess má til gamans nefna að ég var búinn að tapa 6 flöskum í þessu happdrætti fram að þessu þannig að með þessum vinningi er ég bara eina flöslu í mínus!!!!

Þá er það kominn miðvikudagur og engin lát á þessari blessaðri rigningu og roki!!! Horfði á svona ljómandi skemmtilegan leik í meistaradeildinni í gær, skemmti mér konunglega við það sérstaklega síðustu mínótu leiksins, en þetta er stundum svona!!! Svo er það bara góða liðið sem keppir í kvöld og vonandi gegnur því vel, standa vel að vígi fyrir leikinn og ættu að hafa þetta í hendi sér en í boltanum er ekkert öruggt. Það er varla hægt að gera neitt nema hanga inni í þessu veðri, Svanhildur var farinn að fara með Ástþór Örn út á leikvöll sem er rétt hjá okkur áður en hún varð lasinn og maður hefur ekki getað haldið þeim sið upp sökum veðurs núna í marga daga, fúlt. Þá er bara um að gera að vera duglegur í vinnunni og reyna að græða smá peninga í staðinn!!!!

Alveg magnað, ég fór á fund í gær og hef verið glaður síðan. Það var ákveðið að seinka skilju útboðinu mínu aðeins og hafa það klárt um miðjan apríl og hafa það mun stærra í staðinn. Hugmyndin er að taka inn fleiri hluti í verkið þannig að þetta verður tölverð vinna en ég ekki á "deadline" lengur. Gleðin taumlaus. Það eru nýjar evrópureglur sem ekki er búið að fara í gegnum og við þurfum að fara á námskeið til að fá botn í og það námskeið verður ekki fyrr en í lok mars í fyrsta lagi þannig að öllu seinkar. Annars þá er Svanhildur enn lasin, með einhvern hita, vona að það fari að lagast. Ástþór Örn í miklum gír, farinn að hoppa og allan pakkann en ég er búinn að loka öllum skúffum og skápum á hæðinni með einhverju öryggis dóti þannig að núna þarf maður bara að tína upp geisladiska á kvöldin. Annars þá verð ég að segja að þetta veður er um það bil að fara í skapið á mér, meira ógeðið. Labbaði um í Hagkaup í gær á dönskum dögum, mér leið eins og ég væri kominn heim, bara danskar vörur í borðinu, Tulip lifrarkæfa og Faxe Kondi gos!!!!!!!!!!! Keypti mér kassa af því og spurning um að kaupa annan áður en þetta klárast.

Þá er einni helginni lokið enn. Þessi var í rólegri kantinum á heima vígstöðvunum. Svanhildur var lasinn um helgina og er enn en vonadi fer það nú að skána. Ég var frekar slappur um helgina líka en fékk nú ekki meira en 5 kommur. Var aðeins að vinna á laugardaginn en meikaði það ekki að fara í vinnuna á sunnudaginn, það var bara ekki að gera sig í rokinu og rigningunni að fara að slíta sig upp og vinna um stund. Helgin fór því fram innan dyra að þessu sinni. Pabbi og mamma kíktu í heimsókn á sunnudaginn, eru í bænum í einhverjar vikur núna. Ástþór Örn byrjaður að hoppa í rúminu orðin frekar hættulegur, en mjög findin við þetta athæfi sitt, það finnst honum í það minnsta, veltist um af hlátri eftir hvert stökk. Svo er bara að láta daginn líða sem fyrst, er enganveginn að nenna þessu vinnurugli eins og er, orðin allt of löng törn en vonandi fer nú að sjá fyrir endan á henni!!!!

Þá er það síðasti virki dagur þessarar viku, sé samt alls ekki fram á að þetta sé síðasti vinnudagur vikunnar. Setti skúffulæsingar á kommóðuna okkar og skrifborðsskúffurnar þannig að það verður findið að sjá þegar littli maðurinn reynir að rífa þær opnar og tæta upp úr þeim. Það hefur farið tölverð vinna í það hjá okkur að safna saman dóti úr skúffunum og setja aftur í skúffurnar þannig að þetta verður þvílík bragarbót á okkar heimili. Svo lenti ég í því í gær að vera fyrir framan sjónvarpið þegar frúin vildi horfa á The Bachelor, nýju seríuna sem byrjaði í gær. Ég verð nú að segja að mér fannst þetta ekkert frábært og skil í raun ekki "what all the fuzz is about!". Held líka að þessi þáttur sé frekar stílaður inn á (eilítið veruleikafirrtar) konur. Ég mun því ekki bíða spenntur eftir næsta þætti. Mín veruleika fyrring felst frekar í því að horfa á þætti eins og 24 þar sem menn af ótrúlegu harðfylgi og ósérhlífni bjarga Bandaríkjunum frá miklum ógnum. Sem c konur leita í tilbúna rómantík og menn í tilbúinn hetjuskap, allt eins og það á að vera!

Jæja það gegnur óþarflega hratt á vikuna. Ég alls ekki búinn með það sem ég ætlaði að vera búinn með núna og verð því að spíta enn meira í lófana, ekki það að ég hafi neitt verið að slá slöku við undanfarið síður en svo. Verð að segja alveg eins og er að ég er eiginlega búinn að fá alveg nóg af þessu verki og hlakka ekkert smá til þegar þetta verður loksins búið. Annars varð ekki mikið úr kvöldinun hjá okkur fjölskildunni í gær, Ástþór Örn þverneitaði að sofna og endaði með því að mamma hans lagðist með honum í okkar rúm, þar sem hann sofnaði að endingu og hún líka, en það kom ekki að sök þar sem ég steinsofnaði frammi í sófa. Þess má geta að orðið sófi á varla við þetta setu tól þar sem það er einungis eins og hálfssæta sófi!!! Þetta var því gífurlega óþægilegur lúr verður að segjast. Þreyta er því almenn hjá mér í dag!!!!

Jæja þá er fjölskildan komin saman aftur. Ég fór út á völl og sótti Svönku í gær, lenti upp úr miðnætti og þá er alltaf eftir töskubið og þesslags. Ég var því ekki kominn í sæng fyrr en um tvö og mætti því ekki fyrr en 9 í morgunn. Það var í raun mjög ljúf að vakna svona seint. Ástþór Örn kom líka í gær, var voða kátur að sjá mig og sýndi mér allt milli himins og jarðar (reyndar allt hluti sem ég hafði marg oft séð áður :-) ). Hann var svo voða undrandi þegar hann rumskaði í nótt og sá mömmu sína. Var voða kátur að grína í rúminu í morgunn. En svo er það að berjast áfram í þessu blessaða útboði gengur ekki nærri nógu hratt verður að segjast, eng gengur þó. Var að vona að ég þyrfti ekki ap vera að vinna um helgina en margt stefnir í það því miður!!!

Jæja þá líkur grasekkilstímabilinu hjá mér í dag. Ástþór Örn kemur með Kötu í kringum kaffileytið og Svanhildur lendir svo um 12 í kvöld. Ég þarf að sækja hana á völinn og er nú venjulega sofnaður klukkan 12 svo að maður verður að taka með sér smá rokk til að sofna ekki á leiðinni!!!! Annars þá sækist vinnan ágætlega, mætti ganga hraðar þó, teiknivinnan samt að verða langt kominn, næ vonandi að klára þetta í vikulokinn svo ég þurfi ekki að vinna um helgina. Alveg búinn að komast að því að helgarvinna er ömurleg, maður á ekki að gera þetta nema í brýnustu nauðsyn, þetta er mannskemmandi fjári að vera að vinna um helgar. Um helgar á maður að hvílast og safna siðferisþreki fyrir komandi viku, ekki vera að eyða því litla sem eftir er í að vinna. Það er mín skoðun og það er með það eins og svo margt að mín skoðunn er rétt!

Þá er helgin liðinn. Var að vinna á laugardagsmorgunn, og fór svo á nesið upp úr hádegi að hitta Ástþór Örn og Ástþór og Kötu. Planið var að vera duglegur að vinna þar um helgina en það gekk ekki alveg eftir, var eitthvað slappur með nokkrar kommur en náði samt að vinna aðeins. Svo er það stíf vinna næstu daga, ekki enn búinn með útboðið og það þarf að fara að gerast sem fyrst. Helgin var annars hin ágætasta, fór með tengda pabba að skoða hest sonarins sem er í tamningu á bæ rétt hjá Dal, hann var orðið stór og myndarlegur hann Frakkur og Sigurbjörn sem er að temja setti á hann og tók smá rispu fyrir okkur, það var gaman að sjá hann í action. Svo er Svanhildur í London í voða skemmtilegri safna ferð, búið að vera mikið stuð þar. Ég verð svo grasekkill fram á þriðjudag þar sem Kata og Ástþór Örn koma ekki fyrr en á þriðjudag og Svanhildur svo seint á Þriðjudagskvöld. Spurning um að taka þriðju video myndina í kvöld og hafa þannig tekið eina mynd fyrir hvern dag sem ég hef verið einn heima!!!!

Þá er það föstudagurinn. Dagurinn sem ég átti að skila útboðinu!!!! Það er ekki alveg að gerast. Vaknaði á venjulegum tíma í morgun, frekar þreyttur þannig að ég seinkaði klukkunni og lagði mig aftur. Ekkert smá gott, mætti svo í vinnuna klukkan 8, langt síðan að ég hef mætt svo seint í vinnuna. Svanhildur fer svo út á eftir, ég ætla að skutla henni á völlinn og Ástþór Örn fer svo vestur á nes þannig að ég verð einn í kotinu fram á morgun. Ég hef ekki verið einn yfir nótt síðan að Svanhildur átti Ástþór Örn fyrir um ári síðan. Svo bauð Diddi mér í mat í kvöld þar sem Affí systir og Elli mágur eru í bænum núna, ætla að reyna að ná því, ef maður verður ekki búinn að stúta sér úr vinnu áður. Er um það bil að verða þreyttur á þessari törn, hún er búinn að vera full lögn að mínu viti. En maður valdi sér þetta starfssvið og hefur því ekki mikinn rétt á því að vera að væla. Annars góða helgi öllsömun!

Jæja þá er komin fimmtudagur og ég ekkert á leiðinni með að verða búinn með þetta útboð!!!! Veit ekki alveg hvernig það fer!!!! Horfði á svona ljómandi skemmtilegan leik í meistaradeildinni í gær, skemmti mér vel við það!!!! Var annar í sprengidagi í gær þar sem restarnar af súpu og keti vor etnar, það var í góðu lagi verður að segjast, súpan er nú yfirleitt betri daginn eftir. Svo er bara einn dagur í að Svanka fari út og geri mig að tímabundnum grasekkli, þetta verður vonandi skemmtileg ferð hjá henni. Ég þarf að verða duglegur næstu daga svo að ég komist vestur. Væri alveg til í að fara að sjá eitthvað annað en hús, t.d. fjall og ár og þesslags, það er bara miklu meira gefandi verður að segjast!!!!

Þá er sprengidagurinn liðinn. Ég hef persónulega ekki verið mjög hrifinn af saltkjöti í gegnum tíðina en tvö ár í útlöndum án saltkjöts hafa gert að það verkum að mér er farið að finnast þetta hin besta fæða. Mikið etið í gær, amma Svanhildar kom í mat og var þetta hin besta máltíð. Svo var það meistaradeildin í gær þar sem mínir menn unnu loksins sigur á spænsku liði á spænskri grund, alls ekki sannfærandi varnarleikur þó en það kom ekki að mikilli sök þegar upp var staðið. Varnarleikurinn í báðum mörkunum sem Arsenal fékk á sig var í raun svo slappur að um ManU vörnina hefði getað verið að ræða í þessum tilvikum!!! Svo er farið að styttast í að Svanka fari til London, það verður skrítið að vera með Ástþór einn, ekki það að Kata og Ástþór ætla að hjálpa með þetta þannig að maður verður alls ekki einn með hann. Sennilega fara þau með hann vestur á föstudag og ég ætla að reyna að komast vestur á laugardag, ná einni nótt einn í rólegheitunum, það verður ekki amarlegt, leigja spólu og sofna klukkan 10 það er planið!!

Jæja þá er hættulega lítið eftir af þessari viku. Ég ekki nærri búin með það sem fyrir liggur og það er í raun alltaf að bætast við eða þannig! Ég lendi nátturulega í því að vera fyrsti til að hann hluti hérna á stofunni eftir nýjum reglugerðum evrópubatterísins til að geta fengið CE merkingar á hönnunina og þarf því að surfa í gegnum reglugerðar pakka til að finna út hvað þarf að gera og hvað ekki. Biluð leiðindi að lesa þessa texta og skrattanum tímafrekara. En þetta er víst partur af því að vinna nörda vinnu!!! Ég verð ekkert smá fegin þegar þessari vinnuttörn verður lokið, er eiginlega orðin frekar lagnþreittur verður að segjast. Svo er það meistaradeildina að byrja aftur í kvöld, það verður gaman að sjá hvort að mínir menn ná loksins að rústa þessari spánargrílu og leggi ekki Celta Vigo á spáni í kvöld, sé því ekkert til fyrirstöðu. Svo finnst mér að Gerard Houlier eigi að vera sem lengst í starfi hjá Liverpool!
Annars var bolludagurinn í gær eins og allir vita vonandi. Bollukaffi hérna í vinnunni sem var vel en ég verð að segja að ég skil ekki þennan sið að setja hreinan rjóma í bollurnar. Vissulega þarf að vera rjómi, en því ekki að blanda honum í smá fromage eða búðing eins og danirnir gera. Með því að gera það verður rjómin bæði bragðbetri og ekki síður, hann verður ekki eins loftkendur. Þegar maður er búinn að borða eina rjóma bombu er maður nánast kominn með ógeð á rjómanum og langar ekki í fleiri bollur. Með því að blanda rjómann getur maður borðað mun fleiri bollur!!! Þessar gerbollur sem hægt er að kaupa í bakaríum eru líka bara rúnstykki með rjóma, hvað er með það?

Þá er helgin því miður liðin og vinnu vikan byrjuð á ný. Helgin var fín að þessu sinni, fór ekkert í vinnu þó svo að mér hefði ekkert veitt að því, hafði bara ekki nóg siðferðisþrek til þess að hafa mig af stað. Á sunnudag, kíktu svo Diddi og Þórdís ásamt fjöldkyldum og Guðrún Lára og börn líka í smá kaffi, svona í tilefni afmælis Ástþórs Arnar, ekki formlegt afmælis boð þó bara svo smá. Það er líka þannig að þegar systkini mín mæta með börnin sín þá er orðið fullt hús manna :-) En svo er það bra brjáluð vinna hjá mér framundan í vikunni, síðasta vikan sem ég hef til að klára hönnunina mína og í raun slatti eftir. Svanhildur fer svo til Englands með skólanum næstu helgi og ég er að vona að ég verði búinn með verkið fyrir þann tíma svo að ég geti farið vestur með Ástþóri og Kötu og Ástþóri Erni, væri fínt að komast aðeins í sæluna fyrir vesta eftir vinnutörn!!!! Boltin fór líka eins og best varð á kosið um helgina!!!!!

Þá er helgin runnin upp, en helgarfríið ekki að sama skapi. Þyrfti að vinna um helgina en ég nenni því ekki satt best að segja. Sé til hvort að ég nenni að skreppa nokkra tíma um helgina, meira verður það ekki. Var komin heim um fjögurleitið í gær þar sem búið var að baka köku og fínt fínt á mínu heimili í tilefni af afmæli Ástþórs Arnar. Amma hans kíkti svo í kaffi ásamt Viggu fræmku og þetta var hin skemmtilegasta stund. Ekkert sérstakt er planað um helgina, nema að Þórdís systir ætlar sennilega að kíkja í smá kaffi á sunnudag, á enn eftir að nefna það við Didda ef hann verður í bænum. Ég er bara orðin svo gamall að þegar að maður er að vinna svona mikið í vikunni þá finnst mér bara fínt að slappa af heima hjá mér um helgar. Maður fær líka alltaf fína leikfimi í því að passa Ástþór Örn, æði duglegur að rölta um og taka hluti sem hann á ekki að taka!!! Það er því alástæðulaust að fá sér kort í laugarnar ef maður á einn einsárs!!!!

Alveg magnað. Ég er búinn að vera að mæta í vinnuna rétt upp úr sjö í margar vikur núna en í fyrsta skiptið í morgun varð ég fyrstur í vinnuna. Hef alltaf verið að velta því fyrir mér hvort að ég myndi ekki rétt númerið á þjófavarnarkerfinu og í ljós kom í morgunn að svo er. Disarmaði kerfið og fór inn. Matti stóri er venjulga kominn klukkan sjö þannig að hann slekkur alltaf á kerfinu en núna var hann skrefinu á eftir mér. Svo eru það náttúrulega stóru fréttirnar í dag, Ástþór Örn er orðinn eins árs í dag. Núna er hann ekki lengur núll ára og er því teljarinn hans kominn í gang. Við ætlum ekki að halda neitt upp á það, þetta er svoddan agalegur fjöldi af ættingjum sem maður á þannig að ef maður byrjar að halda upp á svona verður það hörku vinna. Þannig að á meðan að við búum ekki í okkar eigin húsi þá getur maður ekki verið að standa í því að halda miklar veislur. Það kemur bara á næstu afmælum. En nóg af blaðri, best að halda áfram að vinna!!

Þá er dagur miðrar viku upp runninn og mátti það ekki tæpara standa. Verð að segja að ég er alveg ekki að nenna að vera í vinnunni þessa dagana. Búinn að vera eitthvað þreyttur og hálf slappur núna í vikunni og þegar þannig stendur á nennir maður alls ekki að vera að vinna. En maður hefur víst ekkert val með það annað en að bíta í skjaldarrendur! Nóg um það. Íslandía er búin að liggja niðri síðan á laugardag þannig að engar uppfærslur hafa verið að heimasíðunni okkar Svönku, en hún virðist vera kominn inn núna, veit ekki alveg hvað er búið að vera í gangi hjá þeim strákunum. Ótrúlega leiðinlegur rigningarsuddi úti núna, rok og rigning, svona ekta íslenskt sælu veður. Sigyn mágkona átti svo afmæli í gær og Diddi bróðir fékk hjá mér matreiðslubók til að elda nú eitthvað fínt fyrir frúna. Eldaði kjúklingin minn með ananasnum og cashew hentunum, hann svíkur aldrei sá, hepnaðist bara vel hjá honum að mér skilst. Annars þá eldaði ég Baska kjúkling um helgina, hann var góður sá. Fékk svo flotta matreiðslubók frá Svanhildi í jólagjöf að það var ekki seinna vænna að fara að nota hana. Svanhildur græjaði svo mjög góðan karftöflurétt með balsamik ediki og allskonar með kjullanum, þetta var allt hið albesta og verður pottþétt eldað aftur!

Heimasíðan okkar www.islandia.is/fortuna liggur því miður niðri vegna bilunar hjá islandia...þetta er ekki það að við séum eitthvað að klúðra málunum.
Kveðja, Svanhildur

Jæja vikan mallar áfram. Ekki mikið að frétta af þessum bænum. Var í vinnunni til 18 í gær frá rúmlega sjö og var eiginlega alveg búinn að fá nóg þegar því var lokið. Leiðinlega mikið eftir af því verki sem ég verð að klára fyrir mánaðarmótin þannig að það verður nóg af yfirvinnu hjá mér á næstunni. Ástþór Örn er allur að braggast orðinn mun kátari og líkari sér aftur þannig að það er allt á réttri leið. Hann er orðinn hinn mesti gönguhrólfur, röltir um öll gólf. Svo er ekki eftir nema að vakan þrjá morgna og næsti þar á eftir er svo helgarfrí!!!

Þá er helgin liðin og eins og venjulega mætti hún vera mun lengri. Sér í lagi þar sem ég fór í vinnu á laugardaginn finnst mér hún eitthvað í styttra lagi. Annars var þetta hin ágætasta helgi, ég var í vinnu á laugardag og svo heima með Ástþóri í gær. Tók til um morguninn heima og svo vorum við Ástþór bara að spauga fram eftir degi. Svanhildur var hjá Guðrúnu í gær þannig að við vorum bara tveir karlarnir heima í gær. Væri svo mikið til í það að eiga mun fleiri daga með honum heimavið, ergo helgarnar þyrftu að vera lengri. Það bendir allt í þá áttina. Í ekki ómerkari löndum en Puerto Rico er alltaf fjögurra daga helgi og einungis unni frá þriðjudegi til fimmtudags. Er það ekki það albesta, eru þeir ekki búnir að fatta hvað þetta gengur út á allt saman. Þykja reyndar frekar latir þegar þeir flytja til annara landa sbr. USA en þá er þetta bara spurning um að vera heima hjá sér í "helgarfríi". En núna er það bara vinnan sem kemur aftur inn af fullum krafti og þá verður maður bara að taka á því.
Ps. gaman að sjá 17milljóna punda manninn slátra Chelski í FA Cup í gær.

Þá er hinn langþráði föstudagur runnin upp. Magnað hvað föstudagar ná alltaf að kæta mann, vitandi af helginni fram undan er ekki hægt annað en að verða kátur. Bölvuð rigning og leiðindi úti núna, algert skýfall í morgun um sjöleytið og mér sýnist það ekkert að batna. Er búinn að vera að hlusta á nýju Air plötuna, Talkie Walkie og hún er nú bara nokkuð seig eins og við var að búast af þeim kumpáunum úr frans. Snilldar grúppa Air. Svo vorum við hjónin að horfa á Bruce Almighty í gærkvöldi, það var hin besta afþreying verður að segjst. Carey-inn var nokkuð seigur í henni og fullt af findnum atriðum að finna í henni. Helgin er svo sem ekkert plönuð þannig lagað, þyrfti faktíst að vinna þessa helgi, en ég sé til hvort ég nenni því eður ey. Það verður að koma í ljós!

Ekki eftir nema einn morguna að vaka fram að helgi og er það vel. Ástþór svaf ekki svo illa í nótt þannig að maður hefði átt að ná að hvíla sig smá, en ég fann það á mér í gær þannig að ég ákvað að fá í bakið í staðinn og liggja andvaka löngum stundum í nótt í staðinn. Þetta fer nú alveg að verða þreytt hjá manni, en helgin er að koma og redda þessu öllu fyrir mann. Nú ætti mydoom vírusinn að vera hættur að dreyfa sér og því "óhætt" að fara að nota kaaza aftur. Komst að því að Red Hot Chili peppers gáfu út fleiri en eina plötu þann 10.mars 2003 að mig minnir, hef ekkert heirt af því satt best að segja, sá þetta bara á amazon.co.uk. Núna er bara að sækja og sjá hvort þetta sé eitthvað af viti.

Nú er kominn nýr dagur sem þýðir í raun aðeins það að Björn Böðvarsson er orðinn rúmlega þrítugur. Hann er núna á milli þrítugs og sextugs á meðan að við hinir erum á milli tvítugs til þrítugs. Þetta er bara svona. Annars þá er ágætt að frétta, Ástþór Örn að braggast, hitinn í það minnsta að fara sem er vel. Svo er það bara blessuð vinnan, en það er allt á fullu þar þessa dagana og veitir ekki af. Thierry Henry búinn að skora 101 mark fyrir Arsenal í úrvalsdeildinni, ekki slæmur árangur það. Ég gersamlega að sofna en það er í góðu lagi þar sem ég pakka af döðlum. Fyndin fæða döðlur, engin undir 40 ára hefur þegið döðlu þegar ég hef boðið þeim þær en allir yfir 40 hins vegar gert svo. Þetta sýnir að þessi krakka gríslingar kunna ekki að meta nammi úr náttúrulegum sykri, heldur þurfa viðbættan sykur til að áhugin vakni. Þetta rennir stoðum undir þá samsæriskenningu að tannlæknar hafi staðið fyrir nammibyltingunni á 20 öldinni.

Ástþór Örn enn veikur, en með mun minni hita samt en undanfarna daga. Það þýðir ekki það samt að hann sofi í einum dúr á næturnar, nei ekki alveg. Hann er búinn að vera að vakna og vera lengi að sofna aftur núna í nokkra daga og þar af leiðandi erum við foreldrarnir ekki upp á okkar ferskasta. Ég verð að segja að ég er gersamlega að sofna, en það er enginn tími fyrir grín núna. Annars er nú frekar lítið að frétta af mér, maður er bara að vinna og svo heima með veikt barn eftir vinnu. En það er nú vonandi að sjá fyrir endan á þessu ferli, menn eru víst veikir í um viku af þessum fjára svo Ástþór gæti átt einn til tvo daga eftir enn. Hlakka bara til að geta sofið aðeins meira, svefn er gífurlega vanmetið fyrirbæri í hinum vestræna heimi.
Svo má til gamans geta að Björn nokkur Böðvarsson óðalsbónda sonur af norðurlandinu er orðinn þrítugur í dag. Björn það eru 3 og 0 á afmæliskortunum. Það dugar ekki lengur venjuleg súkkulaði kaka undir kertin, nei ekkert minna en skúffukaka dugar á svona mörg kerti. En mun þetta þýða að Björninn sé orðinn fullorðin og fari að hegða sér sem slíkur? Án efa NEI, núna er hann bara gamalt barn :-) Til lukku með daginn Bjössi, skál!

Ný vinnuvika og ég svo sem ekkert sérstaklega ánægður með það frekar en fyrridaginn. Ástþór Örn búin að vera með 40°C hita alla helgina og ljótan hósta litla greyið. Þannig að hann svaf ekki mikið í nótt, var mikið að brölta og setjast upp þannig að þetta var frekar erfið nótt. En vonandi fer honum nú að batna. Hann er samt voða góður og reynir að bera sig mannalega en er svona eins og hann sé nett drukkinn í hitanum! Annars þá var hegin frekar rólega hjá okkur fjölskildunni, Svanhildur og Kata skruppu í bæinn á laugardag og ég var heima með Ástþór á meðan. Svo kom Tinna móður systir Svanhildar í mat í gærkvöldi og var þetta líka magnaði tandorí kjúklingur græjaður, ekki ruslið í því. Svo er það bara að halda áfram að hanna skiljurnar mínar, að verða lítill tími eftir í þetta allt saman, en þetta ætti nú samt að sleppa.

Síðasti dagur vinnuvikunnar, hvílík gleði það er. Ég er annars alveg að sofna verður að segjast. Ástþór Örn er alveg stíflaður úr kvefi greyið littla, með dimman ljótan hósta svo hann fékk að koma uppí til okkar þegar hann vaknaði í nótt. Svo er hann náttúrulega svo óvær svona í kvefinu þannig að hann er búinn að vera bröltandi í alla nótt, ergo ég ekki sofið neitt og Svanhildur ekki heldur. Því hef ég ákveðið að dagurinn muni líða hratt í dag þannig að ég komist snemma að sofa í kvöld. Þyrfti að mæta í vinnu um helgina en þekkjandi sjálfan mig mun ég sennilega ekki gera það, helgarfríið er einfaldlega of mikils virði til að vera að eyða því í vinnu!

Seinni hluti vikunnar staðreynd það er bara þannig. Helgin framundan ekkert plönuð en verður efalaust hin besta, það vona í i hvert fald. Búinn að vera og sitja og forrita í gríð og erg undanfarna tvo daga, það er ágætt, alltaf gaman að búa til forrit ef það virkar það er að segja. Ekkert ömuglegra en að búa til forrit sem ekki virkar, vera búinn að eyða tíma í eitthvað sem ekki gengur, en það er svo sem þannig með allt sem að maður gerir. Dæmi: Það er til dæmis ekki gaman að moka skurð og þegar maður heldur að maður sé búinn er skurðurinn orðinn fullur aftur! Ég svo sem veit ekki hvernig þessi aðstæða gæti komið upp en efalaust er allt hægt! Þetta er bara eitt dæmi um leiðindi í vinnu, ja aðstæðurnar eru óteljandi og leita ég hér eftir hugmyndum!

Þá er vikan að hálfna í dag og gott betur upp úr hádegi. Ekki alveg eins ógeðslega kalt og hefur verið undanfarið, núna ekki nema -2°C en fór í -12°C um daginn og það er einfaldlega of kalt í röku Reykjavíkurlofti. Allt í lagi upp á hálendi að vera í svona köldu lofti en ekki niður við sjóinn. Þetta er í raun eins og í Danmörku, um leið að nokkrar gráður af frost voru í loftinu var gersamlega ólíft útivið. Það er í raun enn kaldara í -6°C í Danmörku en hérna heima, rakinn er enn meiri og svo er líka alltaf gola með frostinu þar. Mun kaldara þarna úti en hérna heima á blessaða klakanum. Annars er maður að drukna í vinnu um þessar mundir, það verður að segjast þannig að það er ágætt að mæta um sjö þannig að maður nái tveimur yfirvinnu tímum um fimmleytið og geti komið sér svo heima og átt smá frí seinnipartinn. Þetta hentar í raun bara mjög vel, held að ég sé að ná að venja mig á þetta og ætla að reyna að halda þessu við.

Sat í gærkvöldi og kíkti á SuperBawl mér til mikillar ánægju. Komst að því fyrir mörgum árum síðan að Amerískur fótbolti er fín afþreying en SuperBawl er ekki hægt að horfa á nema af teypi. Það eru einfaldlega endalausar auglýsingar og hlé í þessum leik þannig að maður verður af vera með FF takka á fjarstýringunni til þess eins að komast þokkalega óskaddaður frá þessu öllu saman. En leikurinn var hin mesta skemmtun og réðust úrslitinn ekki fyrr en 4 sek voru eftir af leik. En nóg um það. Svanhildur eldaði einn af mínum uppáhalds réttum í gær, smálúðu í indversku karrý, ekkert smá góða. Þetta er réttur sem hún bjó til upp úr sér fyrr í vetur og núna var verið að prófa hvort hann tækist aftur og tókst það með glans. Annars er allt á fullu í vinnunni, ég farinn að mæta klukkan sjö aftur þannig að maður er kominn með tov yfirvinnutíma um fimmleitið, nokkuð sáttur við það og ætla að reyna að halda því áfram, ekki jafn fjandi dimmt og undanfarnar vikur þannig að það er möguleiki á því að hafa sig framúr núna!!!!

Þá helgin er liðin í aldanna skaut og aldrei hún kemur til baka!!! Fín helgi liðin. Byrjaði á föstudag með þorrablóti VGK og var það hin besta skemmtun. Maturin fínn eins og lög gera ráð fyrir og söngur fram á nótt. Þar fóru fremstir í flokki Ágúst Torfi og Gulli Ó á gítörunum. Söngurinn lenti samt svoltið mikið á okkur Torfa þar sem teksta kunnátta var ekki eins almenn og búist var við. Það vill hinsvegar svo vel til að það hentar okkur ágætlega þar sem við erum lang flottastir. Svo var það bara laugardagur í rólegheitunum, skruppum í kringluna aðeins og vorum svo bara heima seinnipartinn. Ástþór Örn þvílíkt að sjarma stelpurnar á Kaffitár í Kringlunni þá sérstaklega eina þeirra, borsti alltaf þvílíkt til hennar, hann á eftir að verða skæður :-) Svo kíktu Diddi og Sigyn til okkar á sunndaginn, það var mjög fínt, alltaf gaman að fá fólk í heimsókn. Svo kíktum við til Guðrúnar Láru og Einars á sunnudag, í leifar eftir barnaafmæli hjá honum Huga. Það var mjög gaman, Ástþór Örn fann þar bíl sem maður getur setið á og labbaði á eftir honum og dró hann á eftir sér um allt hús. Gekka þarna í langa stund, frekar montinn, fékk svo bílin lánaðan heim til að geta æft sig meira í labbinu. Hann er farinn að taka fleiri skref óstuddur, þannig að hann er nánast farinn að ganga. Þetta innskot var í boði stolts pabba :-)

Þá er hinn langþráði föstudagur runnin upp, það þýðir í raun að ég má sofa á morgunn!!!! Ástþór Örn vaknaði snemma í morgun (nótt) og fékk að koma upp í hjá okkur, en var samt ekkert á því að sofna, eða í það minnsta að vakna alltaf með svona 10mín millibili og helst setjast upp og detta svo á andlitið á mér og þess slags. Svo er það alltaf voða gaman þegar maður vakar upp við að hann er að sparka í framaníið á manni. En það er samt voða notalegt að hafa svona kút hjá sér á morgnana, ekki alveg eins leiðinlegt að vakna. Annars þá er ég að reikna hardcore burðarþolsfræði í vinnunni, var bara alls ekki búinn að gleyma hvað slík fræði eru leiðinleg og héðan í frá mun ég aldrei gleyma því. Svo er það bara þorrablótið í kvöld og helgin framundan. Megið þið eiga góða helgi öll sömun.

Heirðu loksins sér maður fyrir endan á vikunni og er það vel. Ég er langt komin með hönnunina mína á gufuskiljunum enda ekki seinna vænna, þarf að fara að láta teikna þær og græja. Annars þá er ég bara farinn að sjá helgarfríið í hyllingum, byrjar á þorrablóti á föstudag hérna í vinnunni og svo verða það bara rólegheitin með fjölskildunni þar á eftir. Tengdaforeldrarnir verða úti í Vestmanneyjum um helgina þannig að við verðum að passa hundana um helgina. Spurning um að rölta með kvikindin út og fá sér smá göngu, manni veitir ekki af hreifingunni satt best að segja.

Nú er það officialt, vikan er í handbremsu. Ég lenti í timburmönnum á sunnudaginn síðasta þannig að ég fór inn í þessa vinnuviku frekar þreyttur og það er greinilega ekki að gera sig. Ég er búinn að vera að sofna alla vikuna og enn eru þrír dagar í það að maður geti sofið smá. Jamm þetta er stundum svona og þorrablót í vinnunni á föstudaginn. Ég hreinlega nenni ekki að taka aðra helgi í timburmenn þannig að maður verður að fara varlega í ölið. Á sínum yngri hefði maður nú ekki verið í vandræðum með þetta en ég er jú að verða þrítugur þannig að það breytir greinilega einhverju!!!! Svo keypti Arsenal sinn dýrasta leikmann í gær. Mjög fínt að fá góðan leiknmann svo sem en ekki fyrir þessa peninga upphæð, frekar að veðja á ungu strákana sem eru að koma upp og kosta ekkert en að taka þátt í svona ManU leik. Wenger hefur ekki látið draga sig inn í svona fíflagang fyrr þannig að þetta eru smá vonbrigðið, í það minnsta þar til kauði fer að skora grimmt!!!!

Vá hvað þessi vika ætlar að líða hægt. Mér finnst vera kominn fimmtudagur en það er bara þriðjudagur, hvílík vonbrigði það er. Var allt of lengi í vinnunni í gær og fór svo í bíó strax eftir vinnu þannig að ég náði ekki einu sinni að hitta Ástþór Örn í gær, það er íkt fúllt að hitta ekki á pilt enda get ég ekki beðið eftir því að komast heim núna. Fór í lúxus salin í Smárabíó með Didda og Sigyn í gær að sjá Return of the King. Þessi salur er náttúrulega snilld það verður ekki af honum tekið. Myndin er vel á fjórða tíma í sýningu þannig að það var ágætt að sitja í lazyboy með skemil undir fótum og láta fara vel um sig á meðan að á sýningu stóð. Það þarf náttúrulega ekki að taka það fram að myndin er alveg stórgóð eins og við var að búast enda fékk hún Golden Glob verðlaunin að mér skilst. Enn ein sönnun þess að andstæðingar LOTR myndanna hafa alrangt fyrir sér, en það var nú svo sem vitað öllum sem að vita vildu að sú væri staðan.

Þá er byrjuð ný vinnuvika!!! Koddinn vann nú fyrrihálfleik í morgun, var mjög erfið fæðing að koma sér á fætur. Það hafðist samt fyrir rest og hér ég er. Helgin rann sitt skeið stórslysalaust, kíktum á Laugarvegin á laugardaginn í smá göngutúr með Ástþór Örn. Þvílíkur vindur og kuldi var þar í gangi enda ekki margir þar á ferð. Svo kíktu Vigdís og Marteinn og fjölskylda í kinda löpp og bak á sunnudag. Það var mjög gaman og maturinn klikkaði ekki. Annars var helginni eitt í rólegheitum heima við hjá okkur fjölskyldunni, hefði bara eins og venjulega mátt vera lengri.

Þvílíkt vatnsveður í morgun, göturnar á floti og vinnukonurnar hafa varla undan sökum ofankomu. Ekki seinna vænna en að bræða afgangs ísinn sem er meðfram götum þar sem að hann spáir snjó um helgina hef ég heirt. Eða eins og maðurinn sagði: það var sagt mér!!! En þá er það spurninginn: hver er þessi maður sem er á stöðugu blaðri?? Eins og maðurinn sagði! Þessi maður er alltaf röflandi einhvern illa ígrundaðan fjára, tilhæfulausan með öllu í flestum tilvikum. Svo hver er þessi maður mér er spurn. Svo er það náttúrulega Geir H Horny mann tussan! Djö...! er ég reiður við þetta fífl. Ég er með bíl á rekstrarleigu sem að fyrirtækið rekur og lendi því í hækkunum þeim er fávitinn hefur boðað nú. Alveg magnað, hann ætlaði að gera þetta 2002 en þá voru kosningar í námd og hann hætti við allt saman en núna er langt í næstu kosningar þannig að best að ná inn nokkrum krónum í kassann. Þessi blessaði blái flokkur lofaði skattalækkunum en hvað hafa þeir gert? Hækka bensín skatta, hækkað skatta á rekstrarleigu bíla og í millitíðinni eru þeir búnir að vera að níðast á öryrkjum og núna sjúkum. Þetta eru þokkaleg óféti. Nokkuð klárt að ég mun ekki kjósa þennan flokk en þar sem ekkert nema fífl eru í öðrum flokkum er staðan slæm en verður samt ekki verri en þessir fjandans lygarar eru að bjóða uppá. Hvernig getur líka einn maður komið með skattahækkun, hví þarf ekki þingið að fjalla um þetta. Er ólöglegt að búa til bréfasprengju og troða henni upp í rassgatið á helvítinu honum Geir? Spurning um að láta á það reyna!!!!!

Næst síðasti dagur vikunnar, magnað. Var alltof lengi í vinnunni í gær og fór svo of seint að sofa þannig að morguninn var erfiður verður að segjast. Test keyrði þráðlausu heirnartólin mín í gær, þetta er nú bara nokkuð magnað verður að segjast. Fer hér milli hæða og alles með tónlist í eyrunum. Nú er ég sem sé orðinn einn almesti nördinn á stofunni, röltandi með stærðar headphones um allt og stoltur af!!! Annars er allt á fullu í vinnunni em er svo sem vel, ég er bara farinn að hlakka til páskafrísins hvenær er það haldið þið??? Ástþór Örn er alltaf að fá fleiri tennur og núna eru 6 stykki á leiðinni. Ágætt að hann hefur gaman af því að leika sér með tannburstann sinn, ómögulegt að fá að tannbursta hann, hann vill bara sjálfur. Veit ekki hvaðan hann hefur þessa þrjósku þar sem við foreldrar hans erum mjög lítið þrjósk!!!

Þá er vikan mið. Ekki riffilmið, ekki fiskimið, ekki viðmið heldur miðvikudagur!!! Þetta var nú ljómandi gaman hjá mér, ekki! Allt á fullu hjá mér í vinnunni, er að verða æði margt sem að ég þarf að gera á skömmum tíma og gallinn er að ég nenni ekki að vera hérna fram á kvöld eða um helgar, það er bara ekki að gera sig. Fór í Sony Center í gær og keypti mér þráðlaus heirnartól. Almagnað að ég tel, eru að hlaðast enn, en eiga að draga 100m í sjónlínu og eru skrambi þægileg. Núna er því senn liðnir dagarnir þar sem að ég þvæli snúrunni á heirnartólunum mínum í skrifstofustólinn og slít þú næstum úr tölvunni. Almagnað, já!

Jæja núna er að byrja fullt af nýjum seríum í kassanum. Ný syrpa af 24 og er það vel, fylgdist vel með þeim tveimur fyrri, spurning samt hvenær maður fær nóg af þessu consepti, kemur í ljós. Svo er að byrja 10 sería af vinum. Þar sem danir eru oftast langt á eftir okkur með frumsýningu sjónvarpsþátta eru þeir að sýna nýundu seríu núna þannig að við misstum af henni úti þar sem áttunda sería var í gangi þegar við vorum úti í fyrra. Af þessum sökum höfum við hjónin verið að taka Friends þættina á spólum undanfarin kvöld, eina spólu á kveldi í þrjú kvöld núna. Húmorinn er að það eru fjórir þættir á spólu, en á DVD eru átta þættir og leiguverð er hið sama að ég hygg fyrir DVD og VHS. Þá er það húmorinn, það á engin leiga Friends á DVD sem samt er þó komin á sölu DVD diska!!!! Þetta eru náttúrulega aumingja allt saman það er svo einfallt með það. Skruppum í afmæli til ömmu Svanhildar í gær, það var fínt, alltaf gaman að fá kökur og kaffi. Það er í raun alltof lítið um veislur almennt í heiminum, eða í það minnsta, mér er alltof lítið boðið í veislur í heiminum!!!!

Já þá er helgin búin því miður. Áttum fínan giftingarafmælisdag við hjúin, elduðum voða gott og dreyptum á rauðvíni. Það er nánast orðið fréttnæmt ef að maður fær sér rauðvín hér á landi, eitthvað sem maður gerði fimm daga af sjö í danmörku. En það er jú eilítið annað verðlag á víni þar en hér þar sem það eru bölvaðir hommonistar sem ráða ríkjum hér. Helgin var svo bara framin í rólegheitunum, Idol á föstudagskvöld eins og lög gera ráð fyrir og svo spillit ekki fyrir að ManU tapaði fyrir Úlfunum á laugardag, það var bara alveg bráðgaman að fylgjast með því verður að segjast. Svo er það bara að reyna að vera öflugur í vinnunni í vikunni, slatti sem bíður ennþá og verður að vera klárt fyrir miðjan febrúar sem nálgast óðfluga!!!!!

Hver orti og söng eftirfarandi línur:

"Tell me Im the only one.
Tell me theres no other one.
Jesus was an only son
Tell me Im the chosen one.
Jesus was an only son for you.
Despite all my rage I am still just a rat in a cage
And I still believe that I cannot be saved."

Því miður hefur þessi grúppa lagt upp laupana, lauparnir atarna.
En þá er það síðasti dagur vinnuvikunnar er ekki lífið ótrúlegt dúndur og æði??? Ekkert stórt planað um helgina ætla reyndar að elda voða góðan indverskan rétt í kvöld í tilefni þess að ár er liðið frá því að við Svanka giftum okkur í ráðhúsinu í Birkerød í Danmörku. Sem sagt fyrra brúðkaupsafmæli okkar á árinu er í dag. Vorum með þennan rétt úti fyrir ári og var það mjög fínt svo að nú skal leika leikinn þann aftur. Svo er Svanhildur búin að laga svo fínt til á hæðinni okkar að maður þarf ekki einu sinni að taka til um helgina, hvílík sæla það er!

Þessi vika hefur bara alveg flogið áfram allt eins og það á að vera, styttist óðfluga í að tugirnir verðið þrír. Þá má til gamans geta að Björn nokkur Böðvarsson er tæpan mánuð frá því að verða þrítugur hehe, um að gera að minna hann reglulega á það strákinn. En það á vonandi fyrir flestum að liggja að verða þrítugir þannig að það ætti að vera hið besta mál, eða hvað!!!! Ég mun sennilega ekki ná því að verða atvinnumaður í knattspyrnu sem er mjög skrítið þar sem ég hef ekki verið að æfa knattspyrnu né lagt nokkurt kapp á að verða atvinnumaður. Hins vegar hef ég fylgst með knattspyrnu að krafti en það er augljóslega ekki nóg að fylgjast með til að ná árangri í íþróttinni. Spurning um að snúa sér að skák eða einhverju þesslags. Svo er það kanski málið þar sem hópur af mér og mínum félögum verður sem fyrr segir gamalmenni á árinu að snúa sér bara hið fyrsta að bochia!!! Gætu jafnvel komið sniðug viðurnefni út úr því svo sem "Björn Bochia" kóngur svo eitthvað sé nefnt!!! Held samt ekki persónulega verð ég að segja. Nei.

þá er það dagur miðrar viku sem í daglegu tali er oft nefndur miðvikudagur. Enginn er það snjórinn sem prýðir götur bæjarins líkt og í norðri um þessar mundir, aðeins ís og sót. Miður þykir mér þau skipti. Fá rokið og kuldan en ekki snjóinn. Hins vegar má til sanns vegar færa að of mikill snjór getur líka af hinu illa verið í stað sem Reykjavík þar sem enginn virðist kunna að aka í snjó og glundurroði og almennur atgangur verður oft á götum úti við hið fyrsta fjúk. Spurningin er því sú hvort að Reykvíkingar geti lært að aka í snjó að gefinni þeirri tilgátu að snjóadögum muni fjölga eða að það sé í raun borinn von. En þó segir máltækið að æfinginn skapi meistarann. Má þá búast við að haldið verði meistarmót í snjóakstri í nánustu frammtíð eða mun sú keppni einskorðast við götur höfuðborgarinnar. Munu menn leggja af gangstéttir og taka í staðinn upp gönguskíða stéttir??? Verða gangandi vegfarendur bannaðir til þess að hægt verði að losna við snjó af götum upp á gangstéttirnar. Þetta eru aðeins nokkrar spurningar sem að ég veit að eru að brenna á okkur öllum. Spáum í tilveruna og vörumst innfluttan ost.

Koddinn hafði betur í slagi morgunsins. Ég lá í klukkustund og safnaði siðferðisþreki til þess eins að drullast á lappir. Þessi kuldi og vindur úti eru ekki alveg að gera sig, vorum líka á smá djammi í gær það hjálpar heldur ekki til við það að koma manni fram úr rúminu. En það hafðist að lokum því miður. Stefnir allt í það að næsti mánuðurinn verði frekar annasamur hjá mér í vinnunni, frekar mikið sem á eftir að gera fyrir þann tíma. Maður hefur bara ekki verið að nenna að vinna eftir jólafríið, hvernig verður maður eftir sumarfríið???? Tengdaforeldrar mínir komu heim í gær frá París. Þau áttu 26ára brúðkaupsafmæli þarna úti og Kata varð líka fimtug þannig að Svanhildur og Vigdís föðursystir hennar voru með smá boð í gær þegar þau komu heim, kampavín og hvítvín og snittur og alles. Svo fór allt liðið á Einar Ben, nema ég var eftir að passa littla gaurinn, það er svo sem fínt núna að vera ekki þunnur þá væri maður sennilega sofandi enn!!!!

Jæja þá er það mánudagur á ný. Var frekar sofandi þegar klukkan hringdi í morgunn og lét eftir mér að liggja í móki í hálftíma, það var magnað. Veit samt ekki alveg hvaða ósið ég er að koma mér upp á, það er bara eitthvað svo kallt og dimmt úti að rúmið virkar sem hinn öflugasti segull. Ummmmm rúm. En það er enginn miskun hjá Magnúsi og ný vinnuvika farin að rúlla. Átti hina bestu helgi, skruppum í bæinn í gær stórfjölskildan, kíktum á kaffihús (Te og kaffi að þessu sinni). Hef ekki komið þangað síðan ég flutti út, fínt kaffihús, gulrótarkakan sveik ekki. Ástþór Örn var líka alsæll með rúnstykkið sitt með skinkunni. Sunnudagurinn fór svo í tiltekt og sjónvarpsgláp, alveg hið besta mál inn á milli að taka smá til hjá sér. Þarf svo að fara með videotækið okkar í viðgerð í dag, búið að vera bilað lengi. Þar er svona sex ára gamallt eða svo og er búið að vera bilað í langan tíma, Panasonic drasl, kostar efalaust gommu að gera við það þannig að það er sennilegra ódýrara að fá sér nýtt. Hvernig er það með þessi aukaútlát eru þau endalaus??? Það dettur eitthvað inn í hverjum mánuði sem maður reikar ekki með og kostar lágmark 20 þús og yfirleitt mun meira. Það sukkar bigtime!!

Föstudagur júhúúú. Enn á ný bardagi við koddan, ekki nema 20 mín í dag. Gengur rólega að snúa sólarhringnum við aftur eftir jóla og áramótafríin. Svo er það bara helgarfríið á eftir djö...! hlakka ég til að sofa lengur á morgunn, það verður magnaður andskoti verð ég að segja. Verkfræðinemar koma svo í vísindaferð á stofuna í dag, var verið að biðja sem flesta að vera við vinnu um fimmleytið þegar þeir koma. Það liggur náttúrulega ljóst fyrri að ég nenni ekki að vera til 17 í vinnunni í dag þannig að það er spurning um að hætta um 2-3 leitið og kíkja aðeins aftur um fimm. Alltaf gaman að sjá fólk í þessum ferðum, svona var maður og kannski örlítið verri :-)

Vá hvað það var erfitt að vakna í morgunn. Vakanði að vanda fyrir sjö en lá svo bara í móki fram undir átta. Þetta er í fyrsta sinn í einhverja mánuði sem ég mæti í vinnuna eftir klukkan átta!!!! Þetta má ekki koma fyrir aftur!!! Annars var alveg magnað að liggja svona í móki, maður ætti að gera þetta miklu oftar, láta svolið eftir sér að lúra!! En helgin byrjar á morgun, magnaður fjári það. Elduðum íkt góðan fisk í gær, smálúðu í indversku karrý og kókosmjólk, var alveg magnaður fjári, get varla beðið eftir að það komi hádegi þannig að ég geti klárað leyfarnar af þessu. Ég er persónulega kominn með krónískt ógeð á Sóma samlokum og mun sennilega ekki leggja mér þær í munn aftur, búinn með þann fjára fyrir líftstíð það er bara þannig. Pylsurnar koma reyndar alltaf sterkar inn, held að það sé ekki hægt að fá leið á þeim, veit ekki hver fjandinn það er með pylsur, það má alltaf éta þær þegar maður er svangur. Sama með góðan borgara, fínt í hádeginu að skreppa á gamla vestið (Old West) hérna við hliðina á vinnunni minni og slíta í sig bogga með osti og frönskum og kokteil unnan úr majó frá vini okkar allra Gunnari Majonesi.

Vikan hálfnuð, verð að segja að það var tölverður bardagi við koddann í morgun. Var eitthvað svo kuldalegt úti og þvílíkt heitt undir sænginni minni, var bara ekki að nenna á fætur enda mætti ég ekki fyrr en hálf átta í morgun. Maður er eiginlega farinn að sjá helgarfríið í hyllingum, fá að sofa aðeins. Hef komist að því að maður ætti í raun alltaf að vera í fríi, launuð það er. Spurning um að fara að vinna einhverjar ruglaðar summur í happdrætti og leggjast í frí í nokkur ár. En í öllu falli þá er ég ekki að nenna að vinna þessa vikuna, það er bara þannig!!!

Ekki nema fjórir dagar eftir af þessari vinnuviku. Steingleymdi í gær að dissa nýársmynd ríkissjónvarpsins. Sá einhver Openberun Hannesar??? Hvað er í haus! Þetta var mest óspennandi og leiðinlegasta mynd sem sýnd hefur verið á öldunum í langan tíma. Illa leikin, leiðinleg saga og bara furðulegt verk. Svo er þetta helvíti í bíó núna að mér skilst. Hvað er með það? Sýna mynd í sjónvarpi og fara svo með hana í bíó. Er þetta ekki eitthvað rugluð aðgerða röð. Ég hef svo sem aldrei haldið því fram að Hrafn Gunnlaugsson sé neitt eðlilegur. En sagan er eftir Davíð Oddson svo ég ætla að vona hans vegna að Hrafn hafi afbakað hana vandlega, hún hafi ekki verið svona léleg í upphafi. En nóg um það og aftur til starfa. Björn nei ég keypti ekki Prowlerinn, tengdapabbi á Skidoo Grand touring 583, ekki mikið leiktæki til háloftaiðkana, en traustur og góður sleði til almenns aksturs.

Þá árið er liðið í aldanna skaut og aldrei það kemur til baka orti skáldið um árið. Búið að vera æði viðburðarríkt ár að minni hálfu. Útskrifaðist með masterinn minn, gifti mig tvisvar, eignaðist barn, flutti á milli landa, byrjaði nýja vinnu, sem sagt nóg að gera á liðnu ári og útséð með að ég kem ekki til með að toppa það í bráð. Núna er svo bara að bíða eftir páskafríinu og þá er orðið æði stutt í sumarfríið!!!!!! En hvaða spaug var þetta áramótaskaup??? Spurning um að hafa almenna aftöku á Ágústi niður á Lækjatorgi fyrir þetta skaup. Þetta var ógeðslegt helvíti þetta skaup, held að ég hafi brosað þrisvar, aldrei hlegið en brosað þrisvar. Það er ekki mjög á mælikvarða skaupanna. Sem dæmi má nefna þegar að Bubbi var spurður í Idol hvernig skaupið hafi verið og hann var eitthvað að dissa það þá klappaði allur salurinn, ergo engum líkaði þetta skaup. Þó gæti það verið að fólkinu sem líkaði ekki við Lord Of The Rings hafi gaman að þessu maður veit ekki alveg hvernig smekkur þess er að virka. En annars er þetta búið að vera hið albesta frí og synd að því sé nú lokið það verður að segjast. Var þetta fína sleðafæri á Snæfellsnesinu um áramótin og var það tækifæri nýtt til fullnustu og sleðanum þeitt um allar jarðir alveg eins og það á að vera!

Þá er það síðari vinnudagurinn í þessu milli fría ástandi. Ég var svo ótrúlega sniðugur í gær að mæta klukkan sjö og vinna til sex í gær þannig að þar sem ég mætti klukkan sjö í morgun þá þarf ég bara að vinna til tólf í dag. Stefnan er svo tekin á það að bruna vestur á land eftir vinnu hjá mér, það verður þó að fara eftri vindi og veðrum hvort lagt verður í hann. Maður er ekki alveg til í að fara í vetraferðalag á lítilli Toyotu með barn í bíl. Magnað hvað það snjóaði í gær, þegar ég mætti í vinnuna var ekki korn á jörðu og ég lagði bílnum uppi við vegg, við hliðina á gám og um hádegi var hann fenntur inni, var í smá tíma að losa hann og koma honum á meira bersvæði. Svona á þetta að vera, smá snjór og björgunarsveitir úti um allan bæ að hjálpa fólki sem ætti að vera í strætu á svona dögum. Fín auglýsing fyrir björgunarsveitirnar svona rétt fyrir flugeldasöluna, gat ekki komið á betri tíma.

Jæja þá er jólafríið sem slíkt búið. Ekki það að það er bara tveggja daga vinna og þá er komið næsta fimm daga frí, þar sem ég ætla að taka mér frí á föstudaginn 2. jan til að lengja þá frítörn aðeins. Verð nú að segja eins og er að ég er enganveginn að nenna að vera í vinnunni í dag, en það var kanski viðbúið eftir svona frí. Var samt mættur laust upp úr sjö í morgun, tölvert afrek þar sem ég svaf til 10:30 í gær og var því um tölverða sveiflu á svöfntíma að ræða. Annars hafa jólin verið hin bestu, mikil rólegheit á mínun bæ og mikið af góðum mat borðað. Skruppum í jólaboð til Didda bróður í fyrradag, Þórdís systir mætti líka þar með sitt lið, það var hin besta kvöldskemmtun og á Hann Diddi þakkir skidar fyrir það. En núna er best að fara að halda áfram að vinna. Til ykkar sem liggja sofandi heima núna: Grrrrrrrrrrrrrrrrr!!

Þá er aðfangadagur kominn og farinn. Áttum hina albestu stund hérna fjölskyldan, góður matur borðaður eins og lög gera ráð fyrir og pakkar opnaði. Þar var mikið af góðum gripum sem upp úr pökkunum komu. Ástþór Örn var alger rúsína í gær, svo stilltur og prúður að það var ekki mikið mál að hafa hann í öllu pakka standinu. Hann fékk talandi rugguhest, var svoltið hræddur við hann í fyrstu en er núna alveg búinn að taka hann í sátt. Maður er svo bara að borða leifarnar í dag, lesa Bettý hans Arnaldar og láta fara vel um sig. Vona að allir hafi það sem best!

Þá er síðasti vinnudagurinn fyrir jól á veg kominn. Græt það ekki í raun, verður að segjast. Vonandi að næstu fimm dagar verði notalegir, sé svo sem ekki af hverju það ætti ekki að gerast þar sem það eru jú jólin. Á enn eftir að skreppa í búð og kippa upp smá pakka, það ætti ekki að taka langa stund, annars er allt þetta gjafa stand klárt meira og minna á mínu heimili. Maður mætir svo galvaskur í tiltekt að vinnu lokinni í dag, ekki þíðir að fara í jólakött hreingerningarinnar. Hef reyndar ekki fengið mér neina flík fyrir jólinn þannig að ég fer í þennan hefðbundna jólakött og þá má jafnvel spyrja, getur hreingerningarkötturinn bætt einvherju við sem jólakötturinn ekki gerir. Því er það spurning um að taka ekki til þar sem engin er ný flíkin. Nei annars maður verður nú að hafa hreint og fínt um jólin það er eiginlega alger skilda. Ef ég nenni ekki að skrifa á morgun þá segi ég gleðileg jól öll sömun!

Þá er byrjun einhver stysta vinnuvika ársins. Mættu í raun allar vinnuvikur vera tveir dagar, það væri í raun alveg gráupplagt. Átti hina ágætustu helgi, vorum þrjú heima, ég Svanka og Ástþór Örn og í raun fjögur með henni Pílu sem við vorum að passa. (Labrador tík tengdaforeldra minna). Skrapp svo í bíó í gær, fór að sjá Matrix Revolution. Jamm. Ég verð að segja að fyrsta myndin í seríunni var alger snilld, ALGER. Svo kom mynd númer tvö, var löng og ekkert meira en lala og eiginlega hálfgert flopp. Svo fór ég í tíubíó í gær og myndin er 129mín. Það er í raun skemmst frá því að segja að ég leitaði að fjarstýringunni stóra hluta af myndinni til að reyna að hraðspóla yfir atriði. Fann helv. fjarstýringuna ekki því er nú ver og miður. Myndin í heild er frekar döpur og hefði geta verið mun styttri. Það verður þó að telja henni það til tekna að mörg atriði í henni voru þrælskemmtileg og maður hélt alltaf að myndin væri að ná sér á flug þá en þeim tókst alltaf að drepa hana niður inn á milli með einhverjum leiðindum. Dómur: Verður að sjást í bíó algert möst, ef það er ekki gert mun maður éta einn hatt og þrjár derhúfur meðan að á áhorfi stendur. Stjörnur: tvær af fimm og ekki orð um það meir.
Annað: Þegar ég var á heimleið í gærkvöldi klukkan 12:30 var bara hörkuvetur, snjór, skafrenningur og gaman gaman, kyngdi alveg niður snjónum. Ég var því farinn að hlakka til að keyra í vinnuna í morgunn, loksins séns á smá aksjón en þá var allur snjórinn orðin blautur og búið að skafa götur. Hvað er með það, ég veit að Reykvíkingar eru frægir fyrir það að kunna ekki að aka í snjó en það er nú alveg óþarfi að skeina göturnar fyrir þá, þetta er sennilega ástæða þess að allir sem að vetlingum geta valdið fá sér jeppa og bruna upp á jökla. Ég svoleiðis í framtíðinni!

Þá er vinnuvikann að enda og er það vel, það er alltaf vel. Svo er það frekar stutt vinnuvika næsta vikan, ekki nema tveir dagar, maður ætti alveg að kljúfa það :-) Það ættu svo að vera stóru Brands jól alltaf og í raun ætti að fella út þessa tvo daga sem maður þarf að vinna milli jóla og nýárs, tekur því varla að vera að vinna þetta. Ég er persónulega mjög hlyntur menntaskólakerfinu þegar menn fengu hálfan til næstum heilan mánuð í jólafrí. Í mínu menntaskóla var maður búinn í prófum á bilinu 15-20 des og byrjaði ekki aftur fyrr en 11-12 janúar, þannig á þetta að vera og enganveginn öðruvísi, það er nú bara þannig. Við hjúin erum svo að verða búin að kaupa flestar jólagjafirnar, ég á bara eftir að finna eitthvað fínt handa Svanhildi, spurning um að rölta í bæinn á laugardaginn og finna eitthvað handa stelpunni. En þá er það spurning dagsins: Hvað finnst ykkur um það að Michael Jackson hafi gerst múslimi eftri þessar kynferðisásakanir, hvað er með það. "Michael varstu eitthvað að taka í krakkana"? "Nei ef þú þegir ekki þá gerist ég bara múslimur". Hann er ekki alveg að gera sig blessaður karlinn. Mér þykir fyrir því Björn en hetjan þín er annað hvort með haustin ofhertan eða vanhertan á herðunum.

Alveg magnaður fjári hvað þessar vikur líða hratt, eða eins og Stebbi Hill orðaði það í laginu um árið "tíminn fljúga fljótt". Þess má til gamans geta þess þar sem Stebbi hefur unnið textagerðaverðlaun oftar en flesti íslenskir popparar ef mér skjátlast ekki, að það að nota orðsamsetningu eins og fljúga fljótt í enda línu (f-f) er stílbrjótur á íslenskum kveðskaparreglum. Þar sem Stebbi heldur að hann sé skáld og hefur reynt að fylgja reglum skáldasamfélagssin þá er þetta ljóður á hann bragarháttum og er þetta því miður ekki einangrað tilvik sem ég vitna í hér. Hinsvegar þá seldi ég Stebba síma sem hann notar í svefnherberginu sínu þegar ég var að vinna í Elko. Síminn þurfti að vera með takka sem hægt er að smella til hliðar til að slökkva á honum svo Stebbi gæti slökt á honum og hent honum í rúmið án þess að þurfa að vera með áhyggjur af því að síminn væri ekki á. Ég myndi segja að svona gripur væri nauðsynlegur í svefnherbergi allra íslenskra stórstjarna.

Nýr dagur, sömu áhyggjur og í gær. Enn sægur að gera í vinnunni en það er svo sem ágætt, maður er ekki að hanga á meðan. Styttist enn í jólin, verður ekkert smá ljúft að komast í jólafrí, hlaða batteríin og borða góðan mat, hvað vill maður hafa það betra. Svanhildur að skrifa jólakortin, ég er víst ekki með nógu góða rithönd til að framkvæma slíkt :-) Annars er allt heimilið búið að liggja í ælupest, nema ég reyndar þannig að ég bíð eftir að röðin komi að mér, verð ábyggilega ekki svo heppinn að sleppa við þennan fjára. Eða hvað????

Jæja enn einn vinnudagur. Hann byrjaði ekki eins snemma þessi vinnudagur eins og þeir flestir hjá mér. Vaknaði reyndar fyrir sjö, klæddi mig og fékk mér morgunmat en þá var kallað á mig. Svanhildur búin að vera að æla lifrum og lungum í alla nótt og ar ekki í neinu standi til að eiga við Ástþór í morgun. Ég hætti því við að fara snemma í vinnuna og fór upp og við lögðum okkur um stund eða þar til Kata vaknaði og tók til við að passa pjakkinn. Var frekar erfið nótt, Ástþór með í maganum líka og var á fartinni alla nóttina. Snéri sér hring eftir hring og sparkaði vel og reglulega í smettið á manni. Ég sem sé svaf ekki neitt og er frekar þreyttur eins og er. Synd og skömm að maður getur ekki keypt sér anfetamín í apótekum eins og var til að hressa sig aðeins við. Verð bara að láta kaffið duga. :-)

Þá er helgin liðinn því er nú ver og miður. En góðu fréttirnar eru þær að það styttist í jólafríið. Það verður svo eiturmagnað að ná að lúra fleiri en tvo daga í röð, þvílík sæla það verður. All brjálað að gera í vinnunni hjá mér, þar að ná að klára það sem ég er að gera fyrir föstudag, vona að það náist. Átti annars fína helgi, Svanka var að vinna eitthvað með pabba sínum um helgina þannig að við Ástþór vorum bara eitthvað að dunda okkur. Það var mjög gaman. Skruppum í nokkrar heimsóknir um helgina, til Vigdísar og Marteins og svo til Didda bróður og hennar Sigynar. Alltaf gaman að fara aðeins út úr húsi og hitta fólk. Maður mætti vera miklu duglegri við þetta.